کورونا سے متاثر ہونے والے بچوں کی تعداد بڑھنے لگی

تفصیلات کے مطابق   پنجاب میں کورونا سے متاثر ہونے والے بچوں کی تعداد بڑھنے لگی ہے۔محکمہ صحت کے مطابق  مجموعی طور پر کورونا وائرس متاثر ہونے والے افراد میں پانچ عشاریہ نو فیصد پندرہ سال سے کم عمر بچے تھے، اب تک پندرہ سال سے کم عمر کے بارہ ہزار چار سو باسٹھ بچے پنجاب میں کورونا سےمتاثر ہوئے ہیں۔

 محکمہ صحت کے مطابق   شہر لاہور میں اب تک پانچ ہزار تین سو ایک بچے کورونا وائرس سے متاثر ہوئے ہیں، شہر لاہور میں رپورٹ ہونے والے کیسز میں چار عشاریہ سات نو فیصد بچے تھے۔شہر لاہور میں اب تک مجموعی طور پر ایک لاکھ دس ہزار چھ سو چون افراد موذی وبا سےمتاثر ہوئے ہیں۔

ملک  میں کورونا وائرس کی تیسری لہر جاری ہے اور یومیہ کیسز اور اموات میں اضافہ دیکھا جارہا ہے جس کے باعث حکام نے ایک مرتبہ پھر سخت پابندیوں کا انتباہ دیا ہے۔ نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق گزشتہ 24 گھنٹوں میں کورونا سے مزید67  افراد چل بسے جس کے بعد اموات کی مجموعی تعداد 14 ہزار158ہوگئی ہےجبکہ ملک میں کورونا کے فعال کیسز کی تعداد 42ہزار 384ہے، اب تک کورونا کے  6 لاکھ 49ہزار 824کیسز رپورٹ ہوچکے ہیں ۔

پنجاب

پنجاب میں کورونا مریضوں کی تعداد 2لاکھ10ہزار 095ہوگئی ۔ جبکہ صوبے میں اب تک 6 ہزار190افراد جان سے ہاتھ دھو بیٹھے ہیں ۔

سندھ

سندھ میں کورونا وائرس سے سب سے زیادہ متاثرہ مریضوں کی تعداد  2 لاکھ 64ہزار 355 ہو گئی جبکہ صوبے میں اب تک 4 ہزار 487 افراد جان کی بازی ہار گئے ۔

خیبرپختونخوا

خیبرپختون خوا میں کورونا وائرس سے متاثرہ مریضوں کی تعداد83 ہزار   630ہوچکی ہے ۔ صوبے میں 2274افراد چل بسے۔

بلوچستان

بلوچستان میں کورونا وائرس کے اب تک 19 ہزار453کیسز رپورٹ ہوئے ہیں جبکہ صوبے میں 205 مریض چل بسے ۔

اسلام آباد

وفاقی دارالحکومت اسلام آباد میں مجموعی طورپرمتاثرہ افراد کی تعداد 55 ہزار 056جبکہ اموات کی تعداد557 تک جاپہنچی ۔

گلگت بلتستان

گلگت بلتستان میں اب تک 4 ہزار 990افراد کورونا کا شکار ہوئے ہیں جبکہ 103افراد جان سے ہاتھ دھو بیٹھے ۔

آزاد کشمیر

آزاد جموں کشمیرمیں کورونا سےمتاثرہ افراد کی تعداد 12 ہزار245 ہوچکی ہے جبکہ342 افراد جان کی بازی ہار گئے ۔

ملک بھرمیں صحت یاب ہونے والے افراد کی تعداد بھی تیزی سے بڑھنے لگی ہے، این سی اوسی کے مطابق گزشتہ  24گھنٹوں میں 2137افراد کوروناوائرس کوشکست دےچکے ہیں۔ ملک بھر میں اب تک5لاکھ93ہزار282مریض کورونا کو شکست دے چکے ہیں ۔