پی ٹی آئی نے ضمنی الیکشن کی ووٹر لسٹیں عدالت میں چیلنج کردیں

میڈیا رپورٹس کے مطابق تحریک انصاف کی رہنما یاسمین راشد کی جانب سے لاہور ہائی کورٹ میں دائر درخواست میں الیکشن کمیشن، صوبائی الیکشن کمیشن اور ڈی آر او کو فریق بنایا گیا ہے۔

درخواست میں مؤقف اختیار کیا گیا ہے کہ لاہور میں انتخابی حلقوں میں ووٹرلسٹوں میں ردوبدل کرکے فراڈ کیا جا رہا ہے، ضمنی انتخاب کےحلقوں میں دوسرےحلقوں کے ووٹرز کو  لسٹوں میں شامل کیا گیا۔

درخواست کے مطابق الیکشن کمیشن کو  ووٹ دوسرے حلقوں میں منتقل کرنے پر درخواستیں دیں، شنوائی نہیں ہوئی،  عدالت سے استدعا کی گئی ہےکہ ضمنی انتخابات میں حکومتی مشینری کے  بے دریغ  استعمال کو  بھی روکا جائے۔

تحریک انصاف کی رہنما کی طرف سے درخواست میں استدعا کی گئی ہےکہ ووٹرلسٹوں کو  الیکشن ایکٹ اور  رولز سے متصادم قرار دے کر کالعدم کیا جائے۔

ادھر لاہور ہائی کورٹ آفس نے ڈاکٹریاسمین راشد کی درخواست پر  درخواست کے ساتھ مصدقہ نقول نہ لگانےکا اعتراض عائد کیا ہے۔