نئے صوبوں کی تعداد پر بحث ہونی چاہیے، صدر ینگ ایکسپورٹرز ایسوسی ایشن

ویب ڈیسک: ینگ ایکسپورٹرز ایسوسی ایشن کے صدر شعیب بٹالوی نے کہا ہے کہ بحث اس بات پر نہیں ہونی چاہیے کہ نئے صوبے بننے چاہئیں یا نہیں، بلکہ یہ سوال اہم ہے کہ ملک میں کتنے نئے صوبے قائم کرنے کی ضرورت ہے۔

انہوں نے کہا کہ نئے صوبوں کے قیام سے نوجوانوں کے لیے روزگار، معیاری تعلیم اور بنیادی سہولیات کی فراہمی کے مواقع بڑھ سکتے ہیں۔ چھوٹی انتظامی اکائیوں کی تشکیل سے حکمرانی کا نظام بہتر بنانے اور عوامی مسائل پر مؤثر توجہ دینے میں بھی مدد مل سکتی ہے۔

شعیب بٹالوی کے مطابق انتظامی اکائیاں چھوٹی ہونے سے منتخب نمائندے اپنے عوام کے زیادہ قریب ہوں گے اور مقامی مسائل کو ترجیحی بنیادوں پر حل کرنے کے لیے مؤثر کردار ادا کرسکیں گے۔

انہوں نے کہا کہ ارکان قومی اسمبلی اپنے حلقوں، وزرائے اعلیٰ اپنے صوبوں جبکہ حکومت مجموعی طور پر عوامی مسائل پر زیادہ مؤثر انداز میں توجہ دے سکے گی۔

انہوں نے نئے صوبوں کے قیام کو انتظامی بہتری، روزگار کے فروغ اور عوام کو بنیادی سہولیات کی بہتر فراہمی سے جوڑتے ہوئے کہا کہ اس معاملے پر سنجیدہ بحث کی ضرورت ہے۔