اسپیس ایکس کی ایک اور اسٹار شپ تباہ

غیر ملکی خبر ایجنسی کے مطابق  اسپیس ایکس کی ایک اور اسٹار شپ تباہ ہوگئی ، ایس نائن 11 کے اڑان بھرنے کے چھ منٹ بعد ہی اس کے کیمرہ کام کرنا بند کرگئے، اسٹارشپ لینڈنگ بھی نہ کرسکی،دورانِ پرواز تباہ ہوگئی۔تباہ ہونیوالی اسٹارشپ دس کلومیٹر تک ہی اڑان بھرسکی تھی۔

ایلون مسک کی کمپنی اسپیس ایکس انسانوں کو چاند اور مریخ تک لےجانے کیلئے اسٹارشپ تیار کرنے کی کوشش کررہی ہے۔

رواں ماہ   اسپیس ایکس کا اسٹار شپ ایس این 10 پروٹوٹائپ اسپیس کرافٹ نے پرواز کے بعد کامیاب لینڈنگ  کی تھی تاہم لینڈ کرتے ہی تباہ ہوگیا تھا۔

کمپنی کے مالک ایلون مسک نے کہا تھا کہ یہ مکمل ناکامی نہیں ہے، ٹیم نے زبردست کام کیا اور ایک دن اسٹار شپ کی پروازیں انسانوں اور سو ٹن سامان کو چاند اور مریخ پر پہنچانے میں ضرور کامیاب ہوں گے۔

خیال رہے کہ اسٹار شپ ایس این 10 نےکافی حد تک کامیابی حاصل کرلی تھی، اسکے مقابلے میں فروری میں ایس این 9 کو ناکامی کا سامنا ہوا جبکہ گزشتہ سال  دسمبر میں بھی ایس این 8 لینڈنگ کے دوران دھماکے سے پھٹ گیا تھا۔