پنجاب اسمبلی ہنگامہ آرائی کیس : 13 لیگی رہنماؤں کی حفاظتی ضمانت منظور 

تفصیلات کے مطابق اسلام آباد ہائی کورٹ کے قائم مقام چیف جسٹس عامر فاروق نے کیس کی سماعت کی ، عدالت نے مسلم لیگ ن کے 13 رہنماؤں کی 14 روزہ حفاظتی ضمانت منظور کی ۔

 درخواست گزاروں کی جانب سے قیصر امام ایڈوکیٹ عدالت پیش ہوئے ۔ عدالت نے 25، 25 ہزار روپے کے مچلکوں کے عوض ضمانت منظور کرتے ہوئے ن لیگی رہنماؤں کو ضمانتی مچلکے جمع کرانے کا حکم دے دیا۔

19 اگست کو لیگی رہنماؤں کے وارنٹ گرفتاری  لاہور کی مقامی عدالت سے جاری کیے گئے تھے ، جن رہنماؤں کے وارنٹ گرفتاری جاری کیے گئے ان میں رانا مشہود، عطااللہ تارڑ، سردار اویس لغاری، مرزا جاوید، سیف الملوک کھوکھر، خضر حیات کھگہ، راجہ صغیر، عبدالرؤف، پیر اشرف، بلال تارڑ اور رانا منان شامل ہیں۔

لاہور کی مقامی عدالت سے وارنٹ گرفتاری جاری ہونے کے بعد مذکورہ  لیگی رہنماؤں نے اسلام آباد ہائیکورٹ سے حفاظتی ضمانت کے لیے رجوع کیا  تھا ۔

یاد رہے کہ لاہور کے تھانہ قلعہ گجر میں 16 اپریل کو پنجاب اسمبلی میں ہنگامہ آرائی کے الزام میں  لیگی رہنماؤ ں کے خلاف مقدمہ درج کیا گیا ۔