پاکستان میں ٹک ٹاک ایپ کی بحالی، ٹک ٹاک کا بیان آگیا

معروف ویڈیو شیئرنگ ایپ ٹک ٹاک نے ایک بیان میں کہا ہے کہ  پاکستان میں ٹک ٹاک ایپ کی دوبارہ بحالی پر خوش ہیں ۔   ٹک ٹاک کی بحالی محفوظ اور مثبت آن لائن کمیونٹی کوفروغ دینے کیلئے ٹک ٹاک کے عزم کا ثبوت ہے۔

  ٹک ٹاک نے مزید کہا کہ  ٹک ٹاک نے پاکستانی باصلاحیت تخلیق کاروں کوایک پلیٹ فارم فراہم کیا ہے۔ٹک ٹاک انتظامیہ پی ٹی اے کے ساتھ جاری بامعنی مذاکرات اور تعاون سے تمام تر اقدامات یقینی بنانے کیلئے پر عزم ہے۔ٹک ٹاک پی ٹی اے کی جانب سے مستحکم ماحول کی فراہمی سے  پاکستان میں مزید سرمایہ کاری کیلئے پر امید ہے۔ٹک ٹاک پاکستانی تخلیق کاروں کیلئے اہم معاشی مواقع کھلے رکھنے کیلئے پرعزم ہے۔ 

اس سے قبل  پشاور ہائیکورٹ نے معروف ویڈیو شیئرنگ ایپ ٹک ٹاک پر پابندی ہٹانے کی اجازت دی تھی، عدالت نے ریمارکس دیے تھےکہ ٹک ٹاک کھول دیں لیکن غیر اخلاقی مواد اپ لوڈ نہیں ہوناچاہیے ۔

یاد  رہے کہ    پشاور ہائیکورٹ کی جانب سے دیئے گئے حکم کی پیروی کرتے ہوئے  پی ٹی اے(پاکستان ٹیلی کمیونیکیشین) نے ملک میں انٹرٹینمنٹ ایپ ٹک ٹاک کو پوری طرح بند کر دیا تھا ۔ چیف جسٹس قیصر رشید خان نے درخواست پر سماعت کرتے ہوئے کہا تھا کہ  جب تک ٹک ٹاک انتظامیہ  غیر اخلاقی مواد روکنے کے لئے آپ کے ساتھ تعاون  نہیں کرتے اس وقت تک ٹک ٹاک بند کیا جائے۔