خاتون کو 46 سال بعد وراثتی حق مل گیا

سپریم کورٹ میں ڈیرہ اسماعیل کی خاتون کے وراثتی حق سے متعلق کیس کی سماعت ہوئی۔ عدالت نے ڈيرہ اسماعيل خان کی رہائشی خاتون کا والد کی جائیداد ميں حصہ تسليم کرتے ہوئے ہائی کورٹ فيصلے کے خلاف بھائيوں کی اپيل خارج کر دی۔

درخواست گزار کے وکیل نے مؤقف اختیار کیا کہ بہنوں نے اپنا حصہ بھائی کو تحفے میں دے دیا تھا۔

جسٹس اعجاز الاحسن نے ریمارکس دیئے کہ جب بھائی کو تحفہ دیا گیا اس وقت بہنیں کم سن تھیں اور کم عمر بہن کیسے بھائیوں کو جائیداد تحفے میں دے سکتی ہیں ؟ ریکارڈ کے مطابق بہن کی جانب سے وکیل نے بیان دیا تو کم سن لڑکی کی جانب سے کوئی وکیل کیسے بیان دے سکتا ہے؟

انہوں نے کہا کہ بھائیوں نے کبھی بہن کو جائیداد گفٹ دی ہے ہر بار بہن ہی کیوں دے؟ اور گفٹ میں کہیں آفر قبوليت کا ذکر نہيں تو اس کی قانونی حيثيت نہيں رہتی۔

جسٹس منیب اختر نے ریمارکس دیئے کہ جب بہن نابالغ تھی تو بھائیوں نے کیسے بہن سے ساری جائیداد لے لی اور نابالغ بہن کوئی بھی کنٹریکٹ نہیں کر سکتی۔

زمین خریدار کے وکیل نے مؤقف اختیار کہا کہ اراضی خریدنے سے پہلے تسلی کی گئی تھی کہ اس میں بہنوں کا حصہ شامل نہیں۔

عدالت نے ریمارکس دیئے کہ خریدار نے تسلی کیسے کی؟ کوئی دستاویز دکھائیں، کیس ریکارڈ سے ثابت نہیں ہوتا کہ خریدار نے ٹھوس تسلی کی ہو۔