واشنگٹن: کیپٹل ہل کے قریب گاڑی سے اسلحہ برآمد، ڈرائیور گرفتار

ملزم کا تعلق ریاست جارجیا سے ہے، پولیس کے مطابق اس کا کہنا تھا کہ وہ سپریم کورٹ میں کچھ دستاویزات کوریئر کرنے آیا تھا۔

کیپٹل ہل پولیس نے تحریری بیان میں بتایا کہ ٹونی پین نامی ملزم کو تین ہتھیار رکھنے پر حراست میں لیا گیا ہے۔

وین میں سوار دو مسافروں کو بھی حراست میں لیا گیا تھا لیکن انہیں باضابطہ گرفتار نہیں کیا گیا۔

پولیس افسران کو سفید وین سپریم کورٹ کے باہر غیر قانونی طور پر پارک ہوئی نظر آئی تھی۔

جب افسران نے وین سوار افراد سے پوچھا تو انہوں نے بتایا کہ وہ عدالت میں کچھ دستاویزات دینے آئے ہیں۔

مرکزی ملزم نے خود ہی پولیس کو بتایا کہ اس کی گاڑی میں ہتھیار موجود ہیں، تلاشی کے دوران دو ہینڈ گن اور ایک شاٹ گن برآمد کی گئی۔