عمران خان کی رہائشگاہ کے باہر سے حراست میں لیے گئے مشکوک شخص کا موقف آ گیا

 سابق وزیراعظم عمران احمد خان نیازی کی رہائشگاہ کے باہر سے حراست میں لیے گئے مشکوک شخص کا موقف آ گیا۔چئیرمین پی ٹی آئی عمران خان کی رہائشگاہ کے باہر سے مسلح شخص کو گرفتار کیا گیاتھا ۔میڈیا رپورٹس کے مطابق پولیس نے شک پڑنے پر مشکوک شخص کو حراست میں لیا تو اس سے پستول برآمد ہوا۔مسلح شخص عمران خان کی رہائشگاہ کے قریب لگے بیرئر تک پہنچ گیا تھا۔ 

ضرار اللہ خان نامی شخص کو قانون نافذ کرنے والے اداروں نے حراست میں لے لیا۔ پولیس نے پستول بھی قبضے میں لے لیا۔پولیس ذرائع کا کہنا ہے کہ لائسنس تحویل میں لے کر تصدیق کی جا رہی ہے ۔جب کہ حراست میں لیے گئے شخص کا کہنا ہے کہ میں پی ٹی آئی میانوالی کا ڈسٹرکٹ صدر ہوں، میرا پستول لائسنس یافتہ ہے۔ مذکورہ شخص نے مزید بتایا کہ میانوالی سے میرے ساتھ تین اور لوگ بھی آئے،میری دشمنی ہے جس وجہ سے ہر وقت پستول ساتھ رکھتا ہوں۔ میرا پستول لائسنس یافتہ ہے اور اپنی حفاظت کے لیے پاس رکھا ہے۔

لاہور: زمان پارک میں پولیس تلاشی کے دوران کارکن سے پستول برآمد،پولیس نے پستول قبضے میں لے لیا،میں پی ٹی آئی میانوالی کا ڈسٹرکٹ صدر ہوں، نصر اللہ خان
میرا پستول لائسنس یافتہ ہے، نصر اللہ خان
پولیس نے لائسنس اور نصر اللہ خان کو تحویل میں لے لیا۔ پولیس لائسنس کی تصدیق کرا رہی ہے pic.twitter.com/bKlkQt8AP0

— Muhammad Akram (@akramhashmi01) February 10, 2023

خیال رہے کہ 27 جنوری کوعمران خان کی بنی گالہ رہائش سے پولیس کی سکیورٹی ہٹا لی گئی تھی۔ عمران خان کی سکیورٹی پر اسلام آباد پولیس کے ڈی ایس پی سمیت 170 اہلکار تعینات تھے۔ اہلکار بنی گالہ میں عمران خان کی رہائش گاہ پر مختلف شفٹوں میں ڈیوٹی کے فرائض سر انجام دے رہے تھے،عمران خان سے ایف سی اور خیبرپختونخوا پولیس کے اہلکار بھی واپس لے لیے گئے ہیں۔ اسلام آباد پولیس کے مطابق بنی گالہ میں سابق وزیراعظم کی نجی رہائش گاہ ہے،عمران خان گزشتہ کئی ماہ سے اسلام آباد میں مقیم نہیں،ان کی غیر موجودگی میں اسلام آباد پولیس یا دیگر صوبوں کی پولیس نہیں لگائی جا سکتی۔