عمران خان کا ملک بھر میں انتخابی مہم شروع کرنے کا اعلان

پاکستان تحریک انصاف کے سربراہ عمران خان نے سپریم کورٹ از خود نوٹس کیس کا فیصلہ آنے کے بعد پنجاب اور خیبر پختونخوا میں انتخابی مہم ہفتے کے روز شروع کرنے کا اعلان کردیا ہے۔ 

لاہور میں ویڈیو لنک کے ذریعے خطاب کرتے ہوئے عمران خان نے پارٹی عہدیداروں کو ہدایت کی ہے کہ ہر ضلع میں روزانہ کی بنیاد پر کارنر میٹنگز اور جلسوں کا اہتمام کیا جائے ، کارنر میٹنگز اور جلسوں سے سربراہ تحریک انصاف ویڈیو لنک کے ذریعے خطاب کریں گے اور ملک کو مشکلات سے نکالنے کا پلان بتائیں گے ۔ 

سابق وزیر اعظم کا کہنا تھا کہ پی ڈی ایم کی حکومت نے ملک کو شدید نقصان پہنچایا ہے ، پاکستان کی معیشت ڈوب چکی ہے جس کی وجہ سے دنیا کا کوئی ملک ہمیں قرضے دینے کو تیار نہیں ہے، موڈیز کے مطابق پاکستان میں قرض واپس کرنے کی سکت نہیں رہی ہے ۔

انہوں نے کہا کہ ملک میں مہنگائی کی شرح میں ہوشربا اضافہ ہوا ہے جس کی وجہ سے عوام کے لیے گزارہ کرنا مشکل ہوگیا ہے ۔ 

عمران خان کاکہنا تھا کہ میں قاتلانہ حملے کے بعد گزشتہ روز پہلی مرتبہ اسلام آباد گیا جس کی وجہ سے عوام کی بڑی تعداد جوڈیشل کمپلیکس میں جمع ہوگئی ، حکومت نے گھبراہٹ میں میرے خلاف دہشتگردی کا مقدمہ بنادیا ہے ۔

انہوں کہا کہ مریم نواز نے نیب میں پیشی کے موقع پر پلاننگ کرکے نیب آفس پر پتھراﺅ کیا لیکن ان کے خلاف کوئی مقدمہ درج نہیں کیا گیا ۔