کار سرکار میں مداخلت: فواد چودھری کی عبوری ضمانت منظور

انسداد دہشتگردی عدالت نے پاکستان تحریک انصاف کی ریلی میں پولیس پر تشدد، اقدام قتل، قتل، جلاؤ گھیراؤ کرنے اور کار سرکار میں مداخلت کا معاملے پر پی ٹی آئی رہنما فواد چودھری کی عبوری ضمانت منظور کرلی۔

پاکستان تحریک انصاف رہنما فواد چوہدری کے وکلاء ظفر اقبال اور سکندر ذوالقرنین ایڈووکیٹ نے انسداد دہشت گردی عدالت میں عبوری ضمانت کی درخواست دائر کی ، انسداد دہشتگردی عدالت کے جج اعجاز احمد بٹر نے فواد چودھری کی درخواست پر سماعت کی۔

فواد چودھری عدالت کے روبرو پیش ہوئے۔انسداد دہشتگردی عدالت نے5 لاکھ روپے کے ضمانت مچلکوں کے عوض پی ٹی آئی رہنما فواد چودھری کی 25 مارچ تک عبوری ضمانت منظور کرلی۔

واضح رہے کہ تھانہ ریس کورس پولیس نے 12 مختلف دفعات کے تحت فواد چودھری کیخلاف مقدمہ درج کیا تھا، مقدمہ میں دہشت گردی ، قتل ،اقدام قتل ، لڑائی جھگڑا ، کارسرکار میں مداخلت سمیت بارہ دفعات شامل ہیں ۔