چین سے کورونا ویکیسن کی ایک اور کھیپ پاکستان پہنچ گئی

تفصیلات کے مطابق  چین سے کورونا ویکسین کی ایک اور کھیپ پاکستان پہنچ گئی ہے،چین سے خصوصی طیارہ ویکسین لے کر نور خان ایئر بیس پہنچ گیا ہے،  پاک فضائیہ کے خصوصی طیارے میں سائنو فارم کی 5 لاکھ خوراکیں پاکستان پہنچیں ہیں ۔

دوسری جانب   پاکستان انٹرنیشنل ائیرلائنز  (پی آئی اے)  کے ایک ہی دن میں 3 خصوصی طیارے کوویڈ 19 ویکسین لینے چین پہنچ گئے ہیں ۔ پی آئی اے کی تین خصوصی پروازیں  کویڈ19 ویکسین لانے کے لئے بیجنگ پہنچیں ہیں ۔

خصوصی طیاروں پر ویکسین کی لوڈنگ کا کام شروع کردیا گیا ہے، تین بوئنگ 777 طیارے دس لاکھ ویکسین لے کر اتوار کو واپس پہنچیں گے ،  ملک میں جاری کورونا کے بحران پر قابو پانے کیلئے ویکسین کی درآمد تیز کردی گئی ہے۔  کورونا کی ممکنہ تیسری اور  مہلک لہر سے نمٹنے کیلئے تمام حکومتی اداروں نے کام تیز کردیا ہے۔

سی ای او پی آئی اے کا کہنا ہے کہ  ہر مشکل وقت میں پی آئی اے اپنی قوم کے شانہ بشانہ کھڑی ہوتی آئی ہے۔  کورونا عالمی بحران ہے اس سے بچاو کیلئے مل کر اقدامات کرنے ہوں گے ، پی آئی اے اس سلسلے اپنا قومی کردار ادا کرتی رہے گی ۔

گزشتہ ماہ 17 مارچ کو کورونا وائرس کی تیسری کھیپ اسلام آباد پہنچی تھی، ویکسین کی 5 لاکھ خوراکیں لے کر خصوصی طیارہ بیجنگ سے نورخان ایئربیس پہنچا تھا۔

قبل ازیں یکم فروری کو پاکستانی فضائیہ کا ایک خصوصی طیارہ چین سے کورونا ویکسین کی پہلی کھیپ لے کر پاکستان واپس پہنچا تھا، پہلی ویکسین کی کھیپ کورونا وائرس کے خلاف لڑنے والے فرنٹ لائن ورکرز  کو لگائی گئی جبکہ دوسری کھیپ میں کورونا ویکسین معمر افراد کیلئے مختص کی گئی تھی۔