آرمی ایکٹ اور آفیشل سیکرٹ ایکٹ ترمیمی بل قانون بن گیا،صدرمملکت کے دستخط

تفصیلات کے مطابق صدر پاکستان  ڈاکٹر عارف علوی نے آرمی ایکٹ ترمیمی بل اور آفیشل سیکرٹ ایکٹ ترمیمی بل 2023 پر دستخط کردیے، صدر پاکستان عارف علوی کی جانب سے توثیق کے ساتھ ہی دونوں بل قانون کی شکل اختیار کرگئے۔

آرمی ایکٹ کیا ہے؟

آرمی ایکٹ بل میں کہا گیا ہے کہ  چیف آف آرمی سٹاف یا بااختیار افسر کی اجازت سے انکشاف کرنے والے کو سزا نہیں ہو گی۔

پاکستان اور افواج پاکستان کے مفاد کے خلاف انکشاف کرنے والے سے آفیشل سیکرٹ ایکٹ اور آرمی ایکٹ کی دفعات لاگو ہوں گی اسی کے تحت کاروائی عمل میں لائی جائے گی اور مقدمہ چلایا جائے گا۔

آرمی ایکٹ بل کے مطابق قانون کے ماتحت شخص سیاسی سرگرمی میں حصہ نہیں لےسکے  گا ، متعلقہ شخص ریٹائرمنٹ یا برطرفی کے دو سال بعد تک سیاسی سرگرمیوں کا  حصہ نہیں بن سکے  گا اور حساس ڈیوٹی پر تعینات شخص پانچ سال تک سیاسی سرگرمی میں حصہ نہیں لے سکے گا۔ سیاسی سرگرمی میں حصہ لینے پر پابندی کی خلاف ورزی کرنے والے کو دو سال تک سخت سزا ہو گی۔

آفیشل سیکرٹ بل کیا ہے؟

آفیشل سیکرٹ ایکٹ 2023 ترمیمی بل کے ذریعہ ایف آئی اے اور ڈی جی ایف آئی اے کے اختیارات بڑھائے گئے ہیں، انٹیلیجنس ایجنسیز کے نظر نہ آنے والے اہلکاروں کی شناخت ظاہر کرنا جرم قرار دیا گیا ہے۔

آفیشل سیکرٹ بل کے مطابق حساس اداروں کے مخبروں کی شناخت کو ظاہر کرنے پر تین سال قید اور دس لاکھ روپے جرمانہ ہوسکتا ہے ۔

آفیشل سیکرٹ بل کے تحت الیکٹرانک ڈیوائسز، ڈیٹا، معلومات دستاویزات یا دیگر مواد کو تحقیقات میں بطور شواہد پیش کیا جا سکے گا۔ کوئی شخص جو جان بوجھ کر امن عامہ کا مسئلہ پیدا کرتا ہے، ریاست کے خلاف کام کرتا ہے،ممنوعہ جگہ پر حملہ کرتا یا نقصان پہنچاتاہے، جس کا مقصد براہ راست یا بالواسطہ دشمن کو فائدہ پہنچاتا ہے وہ جرم کا مرتکب ہوگا۔

آفیشل سیکرٹ ایکٹ ترمیمی بل اور آرمی ایکٹ ترمیمی بل قانون بن گئے#GNN #NewsUpdates #BreakingNews #GNN_Updates pic.twitter.com/GM2UbT0HVJ

— GNN (@gnnhdofficial) August 19, 2023