توشہ خانہ کیس،عمران خان کی سزا کیخلاف اپیل پر سماعت کل تک ملتوی

اسلام آباد ہائیکورٹ میں توشہ خانہ فوجداری کیس میں چیئرمین پی ٹی آئی کی سزا کیخلاف اپیل پر سماعت کل تک ملتوی کردی گئی۔

اسلام آباد ہائیکورٹ کے چیف جسٹس عامر فاروق اور جسٹس طارق محمود جہانگیری پر مشتمل بینچ نے کیس کی سماعت کی۔ چیف جسٹس عامر فاروق نے ریمارکس دیے کہ کل ڈویژن بنچ نہیں ہے لیکن ہم کیس سن لیں گے۔

چیئرمین پی ٹی آئی کے وکیل لطیف کھوسہ نے عدالت کو بتایا کہ خواجہ حارث پیش نہیں ہورہے، ان کے منشی اغوا ہوئے تھے، خواجہ حارث کی جانب سے بیان حلفی بھی دے رہا ہوں، دائرہ اختیار طے کئے بغیر کارروائی آگے بڑھائی ہی نہیں جاسکتی، 3 گراؤنڈز پر اپنے مؤکل کی سزا معطلی کے لیے دلائل دوں گا۔

چیف جسٹس عامر فاروق نے ریمارکس دیئے کہ کھوسہ صاحب ماتحت عدلیہ سے غلطی ہوئی تو اسے اعتماد دینے کی ضرورت ہے۔

درخواست گزار کے وکیل لطیف کھوسہ نے دلائل مکمل کرلئے۔ الیکشن کمیشن کے وکیل امجد پرویز کل بھی دلائل جاری رکھیں گے۔

وکیل الیکشن کمیشن امجد پرویز نے عدالت کو بتایا کہ کل جمعہ ہے سماعت نہ رکھیں، یہ پھر خود ہی کہتے ہیں کہ چھٹی والے دن عدالت کھل گئی۔

واضح رہے کہ گزشتہ روز سماعت کے دوران سپریم کورٹ ٹرائل کورٹ سے ملنے والی سزا کو بادی النظر میں غلط قرار دیا تھا۔ ہائیکورٹ کو حکم دیا ہے کہ آج کیس کو سُنے ورنہ دن دو بجے عدالت عظمیٰ خود سماعت کرے گی۔