مولانا ضیاءالرحمان کے قتل میں ملوث 4ملزموں کو حراست میں لے لیا گیا

پولیس نے مولانا ضیاء الرحمان کے قتل میں ملوث 4 ملزمان کو گرفتار کر لیا، پولیس کے مطابق ملزمان کو تکنیکی تحقیقات کی مدد سے حراست میں لیا گیا۔

تفصیلات کے مطابق گلستان جوہر میں ایف بی آر کے دفتر کے قریب مولانا ضیاء الرحمان کے قتل کا واقعہ پیش آیا تھا۔پولیس نے واردات میں ملوث چار ملزمان کو گرفتار کر لیا ہے۔

قانون نافذ کرنے والے وفاقی تحقیقاتی ادارے نے پولیس کے ساتھ مل کر کارروائی کی اور ملزمان کو کراچی کے علاقے سنٹرل سے حراست میں لیا گیا ہے۔

پولیس ذرائع کے مطابق 12 ستمبر کو مولانا ضیاء الرحمان کو موبائل فون چھینے کے دوران مزاحمت پر قتل کیا گیا تھا۔ گرفتار کیے گئے ملزمان میں سے تین کی شناخت زبیر ، یاسین اور حق نواز گوپانگ کے نام سے ہوئی ہے۔ 

پولیس کا کہناہےکہ ملزمان نے موبائل فون چھینے کے دوران مزاحمت کرنے پر مولانا ضیاء الرحمان کو نشانہ بنایا۔ ابتدائی طور پر واردات کو ٹارگٹ کلنگ بتایا گیا تھا۔ملزمان کے قبضے سے واردات میں استعمال ہونے والا اسلحہ بھی برآمد ہوا ہے