عدلیہ اور وکلاء دستور کے تحفّظ کا فریضہ سرانجام دیں، عمران خان کا پیغام

چیئرمین پاکستان تحریک انصاف عمران خان نے اپنے اہلِ خانہ کے ذریعے پیغام بھجوایا ہے کہ عدلیہ اور وکلاء پر یہ مقدس ذمہ داری عائد ہوتی ہے کہ وہ اُس دستور کے تحفّظ کا فریضہ سرانجام دیں جس پر ہماری قومی ترقّی کی بنیادیں استوار ہیں۔

سماجی رابطے کی ویب سائٹ ایکس پر اپنے ٹویٹ میں عمران خان نے اپنے پیغام میں کہا کہ یہ لازم ہے کہ قانونی برادری پاکستان کے عوام کے حقوق،خصوصاً ان کے ووٹ کے بنیادی حق کے دفاع وتحفّظ کیلئے ایک تحریک برپا کریں تاکہ انہیں اپنی قیادت کے انتخاب کا حق میسّر آسکے اور وہ اپنے ہاتھوں سے اپنےمستقبل کا تعیّن کرسکیں۔ یہ ثانوی بات ہے کہ عوام کسے اپنی قیادت کیلئے منتخب کرتے ہیں مگر بنیادی معاملہ یہ ہے کہ انہیں اپنے نمائندوں کے انتخاب کا وہ بنیادی حق دیا جائے جو انہیں آئین فراہم کرتا ہے۔

چیئرمین پاکستان تحریک انصاف نے 31 اکتوبر 2023 کو اپنے اہلِ خانہ کے ذریعے پیغام بھجوایا کہ:

عدلیہ اور وکلاء پر یہ مقدس ذمہ داری عائد ہوتی ہے کہ وہ اُس دستور کے تحفّظ کا فریضہ سرانجام دیں جس پر ہماری قومی ترقّی کی بنیادیں استوار ہیں۔ لہٰذا لازم ہے کہ قانونی برادری پاکستان کے عوام…

— Imran Khan (@ImranKhanPTI) November 1, 2023

چیئرمین پی ٹی آئی نے اپنے پیغام میں مزید کہا کہ پاکستان اس وقت بلاشبہ ایک دوراہے پر کھڑا ہے، یہ وہ نازک موڑ ہے جہاں ہم اپنے نظامِ انصاف کو نہایت تیزی سے تباہی کے گھاٹ اترتے اور اس کا شیرازہ بکھرتے دیکھ رہے ہیں چنانچہ اگر ہم اسے مکمل انہدام سے بچانا چاہتے ہیں تو ہمیں حرکت میں آنا ہو گا اور فی الفور اپنے قدم اٹھانا ہوں گے۔

انہوں کا کہنا تھا کہ اگر ہم عدل و انصاف کیلئے میدان میں نہیں نکلتے اور اپنے ججز کی پشت پناہی نہیں کرتے تو ہم اس ملک میں دستور کی بالادستی قائم کرسکیں گے نہ ہی طاقت کی اس حکمرانی کے خلاف کھڑے ہو پائیں گے جس کے تحت صرف موزوں ترین اور امیر ترین ہی زندہ رہ سکتے اور بقا و دوام پاتے ہیں۔