اقوام متحدہ میں کیوبا پر عائد امریکی پابندیوں کے خلاف قرار داد کو بھاری اکثریت سے منظور

اقوام متحدہ کی جنرل اسمبلی نے کیوبا پر عائد امریکا کی اقتصادی اور تجارتی پابندیوں کے خلاف قرار داد کو بھاری اکثریت سے منظور کر لیا ہے۔ امریکا نے کیوبا کے خلاف یہ پابندیاں پہلی بار 1960 میں لگائی تھیں۔

کیوبا کے خلاف امریکا کی طرف سے عائد اقتصادی، تجارتی اور مالیاتی پابندیوں کے خاتمے کی ضرورت کے عنوان سے ہر سال پیش کی جانے والی قرارداد کے حق میں جنرل اسمبلی کے رکن 187 ممالک نے ووٹ دیئے صرف امریکا اور اسرائیل نے اس کے خلاف ووٹ دیا اور یوکرین نے رائے شماری میں حصہ نہیں لیا۔

رائے شماری سے قبل قرار داد پر مسلسل دو دن تک بحث ہوئی۔ جنرل اسمبلی نے تمام ریاستوں سے اس مطالبے کا اعادہ کیا کہ وہ اقوام متحدہ کے چارٹر اور بین الاقوامی قانون کے تحت اپنی ذمہ داریوں کے مطابق پابندیاں عائد کرنے والے ایسے قوانین اور اقدامات کو نافذ کرنے اور ان کا اطلاق کرنے سے گریز کریں۔

کیوبا کے وزیر خارجہ برونو روڈریگوز پاریلا نے کہا کہ ان کے ملک کے خلاف امریکا کی طرف سے 60 سال قبل عائد کی گئی پابندیاں کیوبا کے تمام حقوق کی خلاف ورزی ہیں۔ کیوبا کی 80 فیصد آبادی اپنی تمام عمر ان کے ملک پر امریکا کی طرف سے عائد پابندیوں کی حالت میں گزار چکی ہے۔  ان کے ملک کے خلاف امریکی پابندیاں اقتصادی جنگ ہیں اور ان کا مقصد ملک میں حکومتی اور آئینی نظام کو تباہ کرنے کی کوشش ہے۔