اے این ایف کی منشیات سمگلنگ کے خلاف کارروائیاں ، 1 ٹن 903 کلو گرام منشیات برآمد، 7 ملزمان گرفتار

راولپنڈی: اینٹی نارکاٹکس فورس (اے این ایف )نے منشیات سمگلنگ کے خلاف 8 کارروائیوں میں 1 ٹن 903 کلو گرام سے زائد منشیات برآمد کر کے 7 ملزمان گرفتارکر لیے۔

ترجمان اے این ایف کے مطابق علامہ اقبال ایئرپورٹ پر بذریعہ پرواز نمبر PA-470 جدہ جانے والے مسافر سے 3 کلو گرام آئس برآمدکی گئی ۔جناح ایئرپورٹ پر بذریعہ پرواز نمبر TG-342 بنکاک جانے والے دو مسافروں سے 1 کلو گرام ہیروئن برآمد کی گئی ۔ علامہ اقبال ایئرپورٹ لاہور پر مسافر کے پیٹ سے 52 آئس بھرے کیپسولز برآمدکیے گئے ،ملزم پرواز نمبر QR-629 کے ذریعے دوحہ کے لئے روانہ ہو رہا تھا۔باچا خان انٹرنیشنل ایئرپورٹ پر مسافر کے پیٹ سے 24 آئس بھرے کیپسولز برآمدکیے گئے ،ملزم پرواز نمبر ER-751 کے ذریعے شارجہ کے لیے روانہ ہو رہا تھا۔پشین میں مکان سے 1500 کلو چرس اور 200 کلو ہیروئن برآمدکی گئی ۔

فیروز والا سٹاپ لاہور کے قریب لاوارث گاڑی سے 120 کلو چرس اور 9.6 کلو افیون برآمدکی گئی ۔راوی موٹر وے ٹول پلازہ لاہور کے قریب گاڑی سے 33.6 کلو چرس اور 26 کلو افیون برآمد کر کے دو ملزمان گرفتارکیے گئے ۔خیبر کے علاقے زخہ خیل سے 10 کلوگرام چرس برآمدکی گئی ۔ترجمان نے بتایا کہ گرفتار ملزمان کے خلاف انسدادِمنشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔