ایرانی جنرل کا قتل ، اسرائیل سخت ردعمل کے لیے تیار رہے، ایرانی وزیر خارجہ

شام میں اسرائیلی حملے میں قدس فورس کے ایک سرکردہ کمانڈر کی ہلاکت کے بعد ایران کے اعلیٰ ترین حکام کے مطابق تہران نے اس کارروائی کا سخت جواب دینے کا عہد کیا ہے۔

ایرانی وزیر خارجہ حسین امیر عبداللہیان نے قدس فورس کے تجربہ کار مشیروں میں سے ایک جنرل سید راضی موسوی کے قتل کے بعد اسرائیل کو دھمکی دی ہے کہ تل ابیب کو اس اقدام پر جواب دینے کی الٹی گنتی شروع ہو چکی ہے اور اسرائیل کو اس کے جواب کا انتظارکرنا چاہیے۔

ایرانی صدر ابراہیم رئیسی نے بھی کل سوموار کو کہا تھا کہ "اسرائیل یقینی طور پر اس کی قیمت ادا کرے گا۔ایرانی پاسداران انقلاب کے مطابق رضی موسوی شام میں دمشق کے قریب سیدہ زینب کے علاقے میں اپنی رہائش گاہ پر اسرائیلی حملے میں جاں بحق ہوگئے تھے۔

ایرانی سرکاری میڈیا کے مطابق راضی موسوی قدس فورس میں سب سے زیادہ تجربہ کار مشیروں میں سے ایک تھے۔ یہی وجہ ہے کہ انہیں ایرانی پاسداران انقلاب میں غیر ملکی کارروائیوں کی ذمہ داری سونپی گئی تھی۔