شمالی وزیرستان کی تحصیل میر علی میں نامعلوم افراد کی فائرنگ ، 6 افراد جاں بحق

شمالی وزیرستان کی تحصیل میر علی کے علاقے موسکی میں کھیت سے چھ حجاموں کی لاشیں برآمد ہوئی ہیں۔ تمام افراد کو فائرنگ کرکے قتل کیا گیا ہے اور مقتولین کا تعلق پنجاب سے ہے۔ رپورٹس کے مطابق قتل کیے گئے افراد پیشے کے لحاظ سے حجام تھے اور مقتولین کی میر علی بازار میں ہیئر کٹنگ کی دکانیں تھیں۔

آر پی او بنوں ڈویژن نے بتایا کہ میرعلی کے علاقے موسکی میں قریبی کھیتوں سے 6 افراد کی لاشیں ملی ہیں، لاشوں کی شناخت حجام کے طور پر ہوئی ہے اور ان کا تعلق پنجاب سے ہے۔ ان میں سے ایک کا شناختی کارڈ ہے اور اس کا تعلق ڈی جی خان سے ہے، مزید کہا کہ لاشوں کو پوسٹ مارٹم کے لیے ہسپتال منتقل کر دیا گیا ہے۔

صوبائی محکمہ داخلہ کے اعداد وشمار کے مطابق شمالی وزیرستان میں گذشتہ سال شدت پسندی کے 201 واقعات رپورٹ ہوئے، جن میں 36 سکیورٹی فورسز کے اہلکار جان سے گئے جبکہ 28 عام شہری نشانہ بنے۔ ٹارگٹ کلنگ کے واقعات بھی گذشتہ کئی سالوں سے سامنے آرہے ہیں، جن میں مقامی قبائلی عمائدین، سماجی کارکن اور عام لوگوں کو بھی ہدف بنایا گیا۔

افغان سرحد سے ملحقہ شمالی وزیرستان ماضی میں کالعدم تحریک طالبان پاکستان (ٹی ٹی پی) کا گڑھ رہا ہے لیکن 2014 میں اس ضلعے میں ایک بڑا فوجی آپریشن کر کے عسکریت پسندوں کے ٹھکانوں کا خاتمہ کیا گیا۔