حکومت ہر شہری کو سستا موبائل فون دے گی ،وزیر انفارمیشن ٹیکنالوجی

انفارمیشن ٹیکنالوجی اور ٹیلی مواصلات کے نگران وزیر ڈ اکٹر عمر سیف نے کہا ہے کہ وزارت آئی ٹی نے ''سمارٹ فون سب کیلئے'' منصوبہ شروع کی تمام تیاریاں مکمل کرلی ہیں جس کے تحت ہر شہری کو آسان اقساط پر سمارٹ فون دیئے جائیںگے۔

سماجی رابطے کی ویب سائٹ پر ایک بیان میں انہوں نے کہا کہ وزارت موبائل فون بنانے والی کمپنیوں کی معاونت کیلئے بھی تحقیقی اور ترقیاتی فنڈ قائم کررہی ہے۔

وزیر انفارمیشن ٹیکنالوجی  ڈ اکٹر عمر سیف نے کہا کہ ان منصوبوں کا بڑا مقصد سمارٹ فون تک رسائی کی مسلسل توسیع ہے۔

ڈاکٹر عمر سیف نے کہا کہ پاکستان عالمی سطح پر موبائل فون کی ساتویں بڑی منڈی ہے جہاں انیس کروڑ موبائل زیر استعمال ہیں۔

انہوں نے کہا حکومت کا مقصد پاکستان کے اندر سستے اور اعلیٰ معیار کے موبائل فون کی تیاری کو فروغ دے کر موبائل فون کی درآمدات کو کم کرنا ہے۔