پولیس نے قیدی کی بیٹی کے نکاح کی تقریب کا جیل میں انتظام کرادیا

دبئی: متحدہ عرب امارات میں دبئی پولیس نے قیدی کی بیٹی کے نکاح کی تقریب کا جیل میں انتظام کرادیا۔

الامارات الیوم کے مطابق عرب لڑکی نے دبئی پولیس سے درخواست کی تھی کہ اس کا رشتہ طے ہوگیا ہے اور والد جیل میں ہیں تاہم والد کی موجودگی میں نکاح کے لیے جیل میں تقریب کی اجازت دی جائے جس پر دبئی پولیس کے معاون کمانڈر جنرل میجر جنرل خلیل المنصوری نے جیل میں نکاح کی تقریب منعقد کرنے کی ہدایات جاری کیں۔

دبئی محکمہ جیل خانہ جات کے ڈائریکٹر مروان جلفار نے بتایا لڑکی کی درخواست ملنے پر محکمے نے اس کے والد کے مالی اور ذہنی حالات کو مدنظر رکھتے ہوئے درخواست کی منظوری دی۔

محکمے نے نہ صرف نکاح کی جگہ مختص کی بلکہ دلہن کا گھر فرنشڈ کرنے میں بھی تعاون کیا تاکہ وہ ہنسی خوشی زندگی گزار سکے اور اس پر والد کے جیل میں ہونے کا کوئی منفی اثر نہ پڑے۔