مصنوعی ذہانت ترقی یافتہ معیشتوں میں 60 فیصد ملازمتوں کو متاثر کرے گی، آئی ایم ایف

واشنگٹن: مصنوعی ذہانت (اے آئی) ترقی یافتہ معیشتوں میں 60 فیصد ملازمتوں کو متاثر کرے گی۔

اے ایف پی کے مطابق آئی ایم ایف کی منیجنگ ڈائریکٹر کرسٹالینا جارجیوا نے ورلڈ اکنامک فورم میں شرکت کے لئے سوئٹزرلینڈ کے شہر ڈیووس روانگی سے قبل انٹرویو میں بین الاقوامی مالیاتی فنڈ کی رپورٹ کا حوالہ دیتے ہوئے کہا کہ اے آئی ترقی یافتہ معیشتوں اور کچھ ابھرتی ہوئی مارکیٹوں کی 60 فیصد ملازمتوں پر اثرانداز ہونے والی ہے۔

انہوں نے کہا کہ یہ ٹیکنالوجی ابھرتی ہوئی منڈیوں پر 40 فیصد اور کم آمدنی والے ممالک کو 26 فیصد تک متاثر کرے گی جبکہ مجموعی طور پر تقریباً 40 فیصد عالمی ملازمتیں مصنوعی ذہانت سے متاثرہو سکتی ہیں۔

آئی ایم ایف کی رپورٹ میں بتایا گیا کہ اے آئی سے متاثر ہونے والی نصف ملازمتیں منفی طور پر جبکہ باقی اس کی وجہ سے پیداواری صلاحیت میں اضافے سے فائدہ اٹھا سکتی ہیں۔ کرسٹالینا جارجیوا نے کہا کہ مصنوعی زہانت یا تو آپ کی ملازمت مکمل طور پر ختم ہو سکتی ہے یا یہ آپ کے کام کو بڑھا سکتی ہے جس سے آپ کی آمدن میں اضافہ ہو گا ۔

آئی ایم ایف کے مطابق یہ ڈیجیٹل تقسیم اور کراس کنٹری آمدنی میں تفاوت کو بڑھا سکتی ہے، رپورٹ میں کہا گیا ہے کہ اے آئی کی وجہ سے پرانے ملازمین کو زیادہ خطرہ ہے۔انہوں نے کہا کہ آئی ایم ایف ان خدشات کو دور کرنے کے لئے پالیسی پر غور کر رہا ہے۔

انہوں نے کہا کہ ہمیں خاص طور پر کم آمدنی والے ممالک کی مدد کرنے پر توجہ دینی چاہیے تاکہ وہ مصنوعی ذہانت سے پیش آنے والے مواقع کو حاصل کرنے کے لیے آگے بڑھ سکیں ۔