ہم نے لیول پلیئنگ فیلڈ مانگی لیکن ہم سے تو فیلڈ ہی چھین لی گئی، لطیف کھوسہ

سینئر قانون دان لطیف کھوسہ نے کہا ہے کہ یہ جمہوریت کا سیاہ ترین دن ہے جہاں 25 کروڑ عوام کو حق رائے دہی سے محروم کیا گیا ہے۔ہم نے لیول پلیئنگ فیلڈ مانگی تھی لیکن ہم سے تو فیلڈ ہی چھین لی گئی۔

اسلام آباد میں پی ٹی آئی کے وکیل لطیف کھوسہ نے سپریم کورٹ کی باہر میڈیا سے گفتگو کی ہے۔ انہوں نے کہا ہے کہ ہم نے صاف شفاف انتخابات اور لیول فیلڈ کا کہہ رکھا تھا۔ سپریم کورٹ کے فیصلے کی دھجیاں اڑائی گئیں۔ ہمارے امیدواروں اور تائید کنندہ کو اٹھا لیا گیا۔

انہوں نے الزام عائد کیا کہ پولیس کی بھاری نفری آر او دفتر کے باہر لگی رہی۔ ساتھ جانے والے وکلاء کو گرفتار کیا گیا۔ کاغذات نامزدگی کی جانچ پڑتال کا موقع آیا تو کاغذات نامزدگی کو پھاڑا گیا اور تشدد کیا گیا۔ ایم پی او لگا کر امیدوار گرفتار کئے گئے۔  ڈی سی نے ایم پی او جاری کئے وہی ڈی آر او ہے۔ جلسہ کرنے نہیں دے رہے،گھر مسمار کر رہے ہیں۔ سپریم کورٹ کے نوٹس میں لائے کہ آپ کی حکم عدولی ہورہی ہے۔ پنجاب حکومت کے حکام نے عدالت کو بتایا کہ کوئی واقعہ ہوا ہی نہیں۔ میرے بیٹے کو میرے دفتر کے باہر سے گرفتار کیا گیا۔

آپ کے فیصلے نے جمہوریت تباہ کردی!!!
لطیف کھوسہ چیف جسٹس کے سامنے ڈٹ گئے! pic.twitter.com/rigQkgOYFH

— GNN (@gnnhdofficial) January 15, 2024

انہوں نے مزید کہا کہ چیف جسٹس کی عظمت کو سلام اور وہ کہتے ہیں کہ ٹی وی دیکھتے ہی نہیں۔ انہوں نے الزام عائد کیا کہ الیکشن کمیشن بددیانت ہے۔ جو جیل میں جاتے ہیں اور وہاں سابق چیئرمین کو توہین عدالت کا نوٹس دیتے ہیں۔ ہمارے نشان کو الیکشن کی آمد پر چھینتے ہیں۔الیکشن کے لئے بیس روز کا وقت دیا گیا کہ الیکشن کرائیں۔ اکبر ایس بابر ہمارے کارکن کے آگے نہیں ٹھہر سکتا۔ 13 لوگوں نے آکر یہاں جھوٹ بولا۔ کیا بلاول،نوازشریف،زرداری کے سامنے کوئی ٹھہر سکتا ہے؟ 

انہوں نے بتایا کہ میں نے پیپلز پارٹی کے الیکشن کرائےکسی نے مدمقابل نہ ہونے کا اعتراض نہ کیا۔ یہ لیول پلیئنگ فیلڈ ہے کہ ایک جماعت کو نشان ملا ہوا تھا۔ رات ساڑھے گیارہ بجے اس کو ختم کیا گیا۔ فیصلہ کی بنا پر ہماری خواتین اور اقلیتی نشستوں کو اڑا دیا گیا۔ تحریکِ انصاف نظریاتی کے چیئرمین نے ہمارے ساتھ دستخط کئے۔ اس کو ٹی وی پر لا کر کہلوایا گیا کہ سب جعلی ہے۔ الیکشن کمیشن کہتی ہے ایک جماعت والا دوسری جماعت کی ٹکٹ پر نہیں لڑ سکتا۔ یہ سیاہ دن ہے پاکستان کی جمہوریت میں۔ پچیس کروڑ عوام کو حق رائے دہی سے محروم کیا گیا۔ 

انہوں نے کہا کہ ہمیں الیکشن کمیشن پر کوئی اعتماد نہیں۔ آپ نے 22 اکتوبر کا حکم نامہ جاری کیا تھا۔ لیول پلیئنگ فیلڈ کی بات کی تھی۔ ہم سے فیلڈ چھین لی گئی ہے، ہمیں کوئی اعتماد نہیں ہے۔ الیکشن میں ریٹرننگ افسران کے پاس جاکر کالا کوٹ ووٹ پر پہرا دے گا۔ لوگوں کے دلوں میں عزم اور حوصلہ بڑھ رہا ہے۔