پاک ایران صورتحال کی بہت ہی قریب سے مانیٹرنگ کر رہے ہیں،امریکی مشیر برائے قومی سلامتی

امریکا نے کہا ہے کہ پاکستان اور ایران کے درمیان موجود صورتحال کی بہت ہی قریب سے مانیٹرنگ کر رہے ہیں اور دونوں ممالک پر زور دیا ہے کہ وہ کشیدگی میں اضافے سے گریز کریں۔

وائٹ ہائوس کے قومی سلامتی کے مشیر جان کربی نے کہا کہ دو نوں ممالک کے پاس بڑی تعداد میں اسلحہ ہے اور ہم ان کے درمیان کشیدگی میں اضافہ نہیں دیکھنا چاہتے۔ ہم واضح طور پر جنوبی اور وسطی ایشیا میں کشیدگی میں اضافہ نہیں دیکھنا چاہتے اور ہم اپنے پاکستانی ہم منصبوں کے ساتھ رابطے میں ہیں۔  پاکستان اپنی فوجی کارروائیوں پر خود بات کرے گا وہ اس بارے میں محتاط رہنا چاہتے ہیں۔ انہیں اس بارے میں معلوم نہیں کہ آیا امریکا کو پاکستان کے جوابی حملے بارے کوئی پیشگی اطلاع تھی۔

دریں اثنا امریکی محکمہ خارجہ کے ترجمان میتھیو ملر نے نیوز بریفنگ کے دوران کہا کہ پاکستان اور ایران کے درمیان کشیدگی کو کسی بھی صورت میں نہیں بڑھانا چاہیے۔

میتھیو ملر نے کہا کہ ایران اور پاکستان کشیدگی کا تعلق غزہ کے تنازع سے نہیں ہے لیکن خطے میں کشیدگی کو دیکھتے ہوئے تنازعات میں اضافے کا خطرہ ہے۔پاکستان امریکا کا ایک بڑا نان نیٹو اتحادی ملک ہے۔ 

انہوں نے کہا ہم نے پاکستان اور اس کے ہمسایہ ممالک کے درمیان تعاون پر مبنی تعلقات کی اہمیت کے بارے میں حکومت پاکستان کے تبصرے سنے ہیں جو ہمارے خیال میں نتیجہ خیز اورمفید بیانات تھے ۔ انہوں نے کہا کہ دونوں فریق یقینی طور پر کشیدگی میں اضافے سے گریز کریں اور تحمل سے کام لیں۔