پیمرا نے الیکٹرانک میڈیا کو اہم ہدایات جاری کردیں

پاکستان الیکٹرانک میڈیا ریگولیٹری اتھارٹی ( پیمرا )  نے قومی الیکٹرانک میڈیا سے کہا ہے کہ وہ الیکشن کمیشن کی طرف سے جاری کردہ ضابطہ اخلاق کی پاسداری کرے۔

پاکستان الیکٹرانک میڈیا ریگولیٹری اتھارٹی پیمرا کی طرف سے جاری کی گئی ہدایات میں کہا گیا ہے کہ اس کے تمام پاکستانی  میڈیا  لائسنس یافتہ ادارے آٹھ فروری کو ہونے والے انتخابات کیلئے الیکشن کمیشن کے ضابطہ اخلاق پر عملدرآمد کے پابند ہیں۔

الیکشن کمیشن نے خاص طور سے یہ ہدایات کیں کہ ضابطہ اخلاق کی کسی بھی خلاف ورزی پر سختی سے نمٹا جائے گا اور ایک امیدوار کی طرف سے دوسرے امیدوار کے خلاف لگائے گئے الزامات پر مقدمہ سے پہلے فریقین سے تصدیق کی جائے گی۔

پیمرا کی جانب سے کہا گیا ہے کہ عام انتخابات کے انعقاد کے حوالے سے قیاس آرائیوں اور منفی رپورٹنگ سے گریز کیا جائے، شفاف انتخابات کے انعقاد کے لیے تمام شہریوں اور اداروں کی ذمہ داری ہے کہ وہ الیکشن کمیشن کی معاونت کریں، ایسا کوئی مواد نشر نہ کیا جائے جس سے عام انتخابات سے متعلق شکوک و شبہات جنم لیں۔