پاک افغان طورخم بارڈر تجارتی سرگرمیوں کے لیے دوبارہ کھول دیا گیا

ننگرہار: پاک افغان طورخم بارڈر کراسنگ دس روز بعد دوبارہ تجارتی سرگرمیوں کے لیے کھول دی گئی۔

افغان ڈرائیوروں کو سفری دستاویزات کے لیے 31 مارچ کی ڈیڈ لائن دی گئی ہے۔ سفری دستاویزات کے بغیر کارگو گاڑیوں کے پاکستان میں داخلے پر یکم اپریل سے پابندی ہوگی۔

سرحدی گزرگاہ کھلنے کے بعد افغانستان سے پہلی کارگو گاڑی پاکستان میں داخل ہوگئی ہے۔

کسٹم حکام کا کہنا ہے کہ طورخم بارڈر کھولنے کا فیصلہ پشاور میں افغان قونصل جنرل اور پاکستانی حکام کے درمیان ہوا۔

واضح رہے کہ وفاقی حکومت نے کارگو گاڑیوں کے سفری دستاویزات کے حوالے سے فیصلہ کیا تھا۔ سرحد کو 13 جنوری کو تجارت کے لیے بند کر دیا گیا تھا۔