انتخابات کی کوریج کیلئے غیر ملکی صحافیوں اور میڈیا پرسنز کو اب تک 49 ویزے جاری کئے گئے ہیں، نگران وزیر اطلاعات

نگران وفاقی وزیر اطلاعات، نشریات و پارلیمانی امور مرتضیٰ سولنگی نے کہا ہے کہ انتخابات 2024 کی کوریج کے لیے غیر ملکی صحافیوں اور مبصرین کے حوالے سے بعض عناصر افواہیں پھیلا رہے ہیں جو حقائق کے منافی ہیں، 8 فروری کے انتخابات کی کوریج کے لیے اس وقت تک 49 غیر ملکی صحافیوں اور میڈیا پرسنز کو ویزے جاری کئے۔

وفاقی وزیر اطلاعات نے کہا کہ انتخابات کی کوریج کے لیے متعدد بین الاقوامی صحافیوں نے ویزوں کی درخواستیں دی ہیں، اب تک 49 ویزے (اسلام آباد، لاہور اور کراچی کے لیے) جاری کئے گئے ہیں اور 32 درخواستیں زیر غور ہیں جبکہ دنیا کے مختلف حصوں سے اب بھی درخواستیں موصول ہو رہی ہیں۔ پاکستان ہائی کمیشن نئی دہلی کو الیکشن کی کوریج کے لیے 32 درخواستیں موصول ہوئیں جن پر کارروائی جاری ہے کیونکہ انڈیا میں ویزا جاری کرنے کے لیے مینوئل سسٹم موجود ہے۔ ای سی پی ایکریڈیٹیشن کارڈز کے حصول کے لیے پاکستان میں مقیم غیر ملکی میڈیا نمائندوں اور ان سے منسلک پاکستانی سٹاف کی جانب سے اب تک 174 درخواستیں موصول ہوئی ہیں۔

انہوں نے کہا کہ عالمی مبصرین کی کیٹیگری کے تحت برطانیہ سے 25، رشین فیڈریشن سے 8، جاپان سے 13، جنوبی افریقہ سے 2 جبکہ دولت مشترکہ سے 5 درخواستیں موصول ہوئی ہیں۔ پاکستان کے مقامی میڈیا ہائوسز کو ایکریڈیٹیشن کارڈز بھی جاری کئے جا رہے ہیں، اب تک 6 ہزار 65 صحافیوں کو ایکریڈیٹیشن کارڈز جاری کئے گئے جن میں لاہور سے 1200، کراچی سے 1470، پشاور سے 1050، کوئٹہ سے 600، حیدر آباد سے 355، فیصل آباد سے 250 اور ملتان سے 290 صحافی شامل ہیں۔ 

انہوں نے کہا کہ ای سی پی کی جانب سے جاری کردہ ضابطہ اخلاق بین الاقوامی میڈیا اور مبصرین کے ساتھ شیئر کیا جا رہا ہے۔ انتخابات کیلئے عالمی مبصرین کی تعداد 55 ہے۔  پریس انفارمیشن ڈیپارٹمنٹ الیکشن کی کوریج کے لیے میڈیا سیل قائم کرے گا جہاں میڈیا کو سہولیات فراہم کی جائیں گی۔

 وزیر اطلاعات مرتضیٰ سولنگی نے کہا کہ صحافیوں کی سہولت کے لیے ایکسٹرنل پبلسٹی ونگ میں بھی الیکشن سیل 24 گھنٹے کام کرے گا۔ وفاقی ریاست کی ذمہ داری ہے کہ وہ اپنے شہریوں کو تحفظ فراہم کرے، حکومت غیر ملکی صحافیوں اور مبصرین کو سکیورٹی کی فراہمی کے لیے ضروری اقدامات اٹھائے گی۔