مقامی شہریوں اورمملکت میں مقیم غیرملکی ’’ڈیزیز ایکس‘‘سے تشویش میں مبتلا نہ ہوں، سعودی وزارت صحت

جدہ: سعودی وزارت صحت نے مقامی شہریوں اور مقیم غیرملکیوں سے کہا ہے کہ وہ ممکنہ طور پر مستقبل میں پھلنے والے نامعلوم وبائی مرض ’’ڈیزیز ایکس‘‘ سے تشویش میں مبتلا نہ ہوں۔

ایس پی اے کے مطابق سعودی وزارت صحت نے بیان میں کہا کہ ایکس بیماری اس قدر خطرناک نہیں جتنا کہ عالمی ادارہ صحت کے بیان سے محسوس ہوتا ہے۔

وزارت صحت نے کہا کہ عالمی ادارہ صحت کا بیان فرضی منظر نامے اور تخیلاتی صورتحال پر مشتمل ہے۔ بیان میں کہا گیا کہ اس طرح کی خبر ہر سال جاری کی جاتی ہے۔ وزارت صحت نامعلوم امراض سے نمٹنے کے لیے پوری طرح سے تیار رہتی ہے اور ہر طرح کی صورتحال پر مسلسل نظر رکھتی ہے۔

وزارت صحت نے کہا کہ عالمی ادارہ صحت اور ماہرین صحت گزشتہ عشروں کے دوران جو بیانات دیتے رہے ہیں ان کا مقصد یہ ہے کہ دنیا بھر کے ممالک اپنے یہاں صحت نظام کو موثر بنائیں۔

وبائی صورتحال پر نظر رکھنے اور ان سے نمٹنے کے لیے موثر انتظامات کا اہتمام کریں۔وزارت صحت نے کہا کہ ہر سال انتباہ کے اجرا کا مقصد یہ پیغام دینا ہے کہ دنیا بھر کے انسان یکے بعد دیگرے وباؤں سے دوچار ہوسکتے ہیں کیونکہ ہم سب جراثیم اور بڑی تعداد میں وائرس زدہ ماحول میں زندگی بسر کررہے ہیں۔