نگران حکومت نے جمہوریت کو مضبوط کرنے کیلئے کام کیا ، مرتضی سولنگی

وزارت اطلاعات ونشریات اور پارلیمانی امور نے آج (ہفتہ) اسلام آباد میں اطلاعات ونشریات اور پارلیمانی امور کے نگران وزیر مرتضی سولنگی کے اعزاز میں ایک الوداعی تقریب کا انعقادکیا۔

اس موقع پر گفتگو کرتے ہوئے مرتضی سولنگی نے نگران حکومت کے دورحکومت کے دوران تعاون کرنے پر وزارت کے حکام اور عملے کا شکریہ اداکیا۔انہوں نے کہا کہ ہم نے نگران دور حکومت کے دوران جمہوریت اور آزادی اظہار کے فروغ کیلئے کام کیا۔مرتضی سولنگی نے کہا کہ وہ وزارت کے تمام محکموں کے سربراہان کے شکرگزار ہیں جنہوں نے نگران حکومت کے دوران ان سے تعاون کیا۔انہوں نے امید ظاہر کی کہ نئے وزیراطلاعات بھی جمہوریت اور آزادی اظہار کے فروغ کیلئے کام جاری رکھیں گے۔

اس موقع پر بات چیت کرتے ہوئے سیکرٹری اطلاعات ونشریات شہیرا شاہد نے نگران حکومت کے دور میں وزیراطلاعات ونشریات اور پارلیمانی امور کے وزیر کے طور پر مرتضیٰ سولنگی کی تعریف کی۔انہوں نے کہا کہ مرتضیٰ سولنگی نے مختصر عہد میں جمہوریت اور آزادی اظہار رائے کیلئے سخت محنت کی ہے۔

تقریب کے اختتام پر وفاقی سیکرٹری برائے اطلاعات نے نگران وزیر اطلاعات ونشریات مرتضیٰ سولنگی کو یادگاری شیلڈ بھی پیش کی۔ایڈیشنل سیکرٹری پرنسپل انفارمیشن آفیسر، ڈائریکٹوریٹ جنرل ایکسٹرنل پبلیسٹی ونگ اور جنرل انفارمیشن سروس اکیڈمی کے ایگزیکٹو ڈائریکٹر نے بھی تقریب میں شرکت کی۔