گلوکار جبران راحیل کی عالمی سطح پر کامیابیاں، بطور پلے بیک سنگر بھی مداحوں کے دل جیت لیے

 کلچرل رپورٹر سے

لاہور: پاکستانی گلوکار، نغمہ نگار اور موسیقار جبران راحیل نے جہاں اپنی مدھر آواز، منفرد گائیکی اور موسیقی سے گہری وابستگی کے باعث ملکی اور بین الاقوامی سطح پر اپنی صلاحیتوں کا لوہا منوایا ہے وہی بطور پلے بیک سنگر بھی مداحوں کے دل جیت لیے۔

حال ہی میں ریلیز ہونے والی فلم ’’مینگو جٹ‘‘ کے رومانوی گیت ’’دل وچ‘‘ میں بھی جبران راحیل نے اپنی آواز کا جادو جگایا جسے شائقین نے خوب سراہا، بطور فلمی پلے بیک سنگر ان کو سلور اسکرین نیا ستارہ قرار دیا جارہا ہے۔ 

بطور گلوکار جبران راحیل نے اپنے فنی کیرئیر کا آغاز سال 2018 میں گیت ’’جھوٹا پیار‘‘ سے کیا جبکہ دیگر گانوں میں ’’خیال‘‘، ’’تنہا سا‘‘، ’’ہنگامہ ری پرائز‘‘ اور ’’یا ربی‘‘ شامل ہیں، جبکہ گیت ’’رات‘‘ کے ذریعے انہوں نے ملکہ ترنم نور جہاں کو خراجِ عقیدت بھی پیش کیا، جسے ان کے فنی سفر کا ایک اہم حصہ سمجھا جاتا ہے۔

جبران راحیل نے اپنی محنت کم عمری ہی سے موسیقی کے میدان میں نمایاں مقام حاصل کرنے کی تھان لی انہوں نےدبئی میں منعقد ہونے والے گائیکی کے بین الاقوامی مقابلے میں انہوں نے اپنی آواز کا جادو جگایا، جہاں انہیں معروف بھارتی موسیقار اے آر رحمان کی جانب سے بہترین گلوکار کا اعزاز حاصل ہوا۔

اس کامیابی کے بعد انہیں دبئی کے بین الاقوامی کرکٹ اسٹیڈیم میں اے آر رحمان کے ساتھ براہ راست گائیکی کا موقع بھی ملا، جو ان کے فنی سفر کا ایک اہم سنگ میل قرار دیا جاتا ہے۔

جبکہ  ترکیہ میں منعقد ہونے والے عالمی گائیکی کے مقابلے میں بھی پاکستان کی نمائندگی کرتے ہوئے بھی شاندار کامیابی حاصل کی۔ اس مقابلے میں چالیس سے زائد ممالک کے گلوکاروں نے حصہ لیا، تاہم جبران راحیل اپنی صلاحیتوں کی بدولت نمایاں رہے اور کامیابی کی ٹرافی اپنے نام کی۔

اس کے علاوہ انہوں نے ابوظہبی میں معروف موسیقاروں شنکر، احسان اور لائے کے ساتھ بھی اپنی آواز کا مظاہرہ کیا، جبکہ موسیقار راجیش روشن سے اندازِ رفیع کے مقابلے میں ٹرافی حاصل کرنا بھی ان کے اعزازات میں شامل ہے۔