پاکستان دوست ممالک کے ساتھ اپنے تجارتی تعلقات میں توسیع کا خواں ہے،صدر

صدر ڈاکٹر عارف علوی نے کہا ہے کہ پاکستان دوست ممالک کے ساتھ اپنے تجارتی واقتصادی تعلقات میں توسیع کا خواں ہے۔

وہ پرتگال کیلئے پاکستان کے نامزد سفیر محمد خالد اعجاز اور میانمار کے لئے نامزد سفیر عمران حیدر سے گفتگو کررہے تھے جنہوں نے ان سے ایوان صدر میں ملاقات کی۔ پرتگال کے لئے پاکستان کے نامزد سفیر سے گفتگو کرتے ہوئے صدر نے ان پر زور دیا کہ وہ اپنے میزبان ملک کے ساتھ باہمی تجارتی تعلقات کو مزید مستحکم کرنے کیلئے کام کریں۔

انہوں نے مزید کہا کہ پاکستان معاشی اور تجارتی سرگرمیوں کیلئے ساز گار ماحول یقینی بنارہا ہے۔ صدر عارف علوی نے پاکستان اور پرتگال کے درمیان سیاسی، ثقافتی اور عوام کی سطح پر رابطوں کے ساتھ ساتھ سیاسی سطح پروفودکے تبادلوں کو مضبوط بنانے کی ضرورت پر زور دیا۔صدر نے میانمار کیلئے نامزد سفیر سے ملاقات کے دوران دونوںممالک کے درمیان تعلقات مزید مستحکم کرنے پر زور دیا۔