انتخابات میں دھاندلی کے خلاف ہر سطح پر کوشش اور پرامن مظاہرے جاری رکھیں گے، عمر ایوب

پاکستان تحریک انصاف کے رہنما اور اپوزیشن لیڈر عمر ایوب نے کہا ہے کہ پی ڈی ایم اور اس کی ذیلی نگران حکومتوں نے جو پی ٹی آئی ورکرز کے خلاف اقدامات کئے وہ انسانی حقوق کی خلاف ورزی کے زمرے میں آتا ہے، پولنگ کے بعد 9 فروری کو جس طرح فارم 47 کے ذریعے ہمارے امیدواروں کو ہرایا گیا یہ پاکستان کی تاریخ کیا دنیا میں پہلی بار ہوا ہم اس کے خلاف ہر سطح پر کوشش اور پرامن مظاہرے جاری رکھیں گے۔

اسلام آباد میں پریس کانفرنس کرتے ہوئے رہنما پی ٹی آئی عمر ایوب نے کہا کہ کل پورے پاکستان میں ہم نے پرامن احتجاج کی کال دے رکھی تھی , پنجاب میں غیر آئینی وزیراعلی مریم نواز اور آئی جی پنجاب کے احکامات پر ہمارے پرامن کارکنوں رہنماؤں جن میں ماہر قانون دان بیرسٹر لطیف کھوسہ،بیرسٹر سلمان اکرم راجہ و دیگر کو گرفتار کیا گیا ان پر دہشتگردی کی دفعات لگا کر مقدمات درج کئے گئے، اس وقت بھی ہمارے کارکن جیلوں میں ہے ہم اسکی شدید الفاظ میں مذمت کرتے ہے۔

عمر ایوب نے کہا ہے کہ فاشسٹ حکومت اپنے ہوش و حواس کھوبیٹھی ہے، بنیادی انسانی حقوق کی خلاف ورزی کی جارہی ہے، آئی جی پنجاب ن لیگ کے گھریلو ملازم بن چکے ہیں، مریم نواز کے کہنے پر پنجاب میں مقدمات درج کئے گئے، دھاندلی سے ہمارے امیدواروں کو ہرایا گیا، آئین اور قانون میں رہتے ہوئےاسمبلی اورملک میں احتجاج کریں گے۔

 رہنما پی ٹی آئی عمر ایوب نے کہا کہ ہماری قومی اسمبلی کی 180 سیٹیں ہونی چاہیئے، الیکشن کے بعد 9 فروری کو فارم 45 تبدیل کرکے فارم 47 بنائے گئے، دھاندلی کے ذریعے ہمارے امیدواروں کو ہرایا گیا، 9 فروری کو ملک میں دھاندلی کا ورلڈ ریکارڈ دیکھا گیا۔ملک بھر میں پرامن احتجاج کریں گے، پی ڈی ایم ون حکومت مہنگائی کا سیلاب لائی تھی، اب یہ حکومت مہنگائی میں مزید تیزی لائے گی۔

انہوں نے مزید کہا کہ آئی جی پنجاب ن لیگ کا گھریلو ملازم بن چکا ہے، کل لطیف کھوسہ، سلمان اکرم راجہ سمیت درجنوں کارکنان کو گرفتار کیا گیا، مریم نواز کے کہنے پر پنجاب میں مقدمات درج کئے گئے۔اگلے کچھ دنوں میں بجلی کی قیمتوں میں اضافہ دیکھا جائے گا، وزیر اعظم اور وزیراعلیٰ غیرقانونی اور غیرآئینی ہے، پولیس کی پرفارمنس زیرو ہے، ہم پبلک اکاؤنٹس کمیٹی کے ذریعے ان کے اکاؤنٹس چیک کرائیں گے۔

عمر ایوب نے کہا کہ پولیس کو ان کے سربراہان نے کہا پی ٹی آئی کو کچلا جائے، ہمارے 100 سے زائد کارکنان کو گرفتار کیا گیا، ملک جدید دور میں سوشل میڈیا کے بغیر ترقی نہیں کرسکتا۔ پولیس کی کرپشن اور نا اہلی کی وجہ سے جرائم کی شرح میں اضافہ ہوا، بشریٰ بی بی کو بانی پی ٹی آئی کی کمزوری نہ سمجھیں، حکومت ہوش و حواس کھو بیٹھی ہے۔