صدارتی انتخابات، مسعود پزشکیان ایران کے نئے صدر منتخب

ایرانی الیکشن کمیشن نے مسعود پزشکیان کی کامیابی کا اعلان کر دیا۔ مسعود پزشکیان ایران کے نئے صدر منتخب ہو گئے ہیں۔

ایران میں صدارتی انتخاب کے دوسرے مرحلے کے نتائج کے مطابق امیدوار مسعود پزشکیان نے اپنے حریف اور سخت گیر رہنما سعید جلیلی پر باآسانی فتح حاصل کر کے صدارتی انتخاب میں کامیابی حاصل کر لی ہے۔

ایران میں الیکشن کے دوسرے مرحلے میں ووٹر ٹرن آئوٹ 49 فیصدر رہا۔ اصلاح پسند امیدوار مسعود پزیشکیان نے اپنے حریف سعید جلیلی کو 28 لاکھ سے زائد ووٹوں سے شکست دی۔ سعید جلیلی صدارتی انتخابات میں ایک کروڑ 35 لاکھ سے زائد ووٹ حاصل کر سکے جبکہ مسعود پزشکیان کو ایک کروڑ 63 لاکھ سے زائد ووٹرز نے ووٹ ڈالے۔

ایرانی الیکشن ہیڈکوارٹر کی جانب سے صدارتی انتخاب کے دوسرے مرحلے کے نتائج کا اعلان کیا گیا ہے جس کے مطابق 3  کروڑ افراد نے الیکشن میں ووٹ ڈالے جن میں سے ایک کروڑ 63 لاکھ سے زیادہ افراد نے مسعود پزشکیان کو ووٹ دیا۔

پہلے صدارتی انتخابی مرحلے میں مسعود پزیشکیان کو 42.4 فیصد ووٹ ملے تھے جبکہ ان کے قریب ترین حریف امیدوار قدامت پسند سیاسی رہنما سعید جلیلی تھے، جنہیں 38.6 فیصد تائید حاصل ہوئی تھی۔

خیال رہے کہ گزشتہ روز ایران میں نئے صدر کے انتخاب کے لئے دوسرے مرحلے کا انعقاد کیا گیا تھا، جس میں ووٹرز نے صبح 8 بجے سے رات 12 بجے تک ووٹ کاسٹ کئے۔ دوسرے مرحلے کے انتخابات میں انتظامیہ کی جانب سے پولنگ سٹیشن میں ووٹرز کے رش کی وجہ سے پولنگ کا وقت تین بار بڑھانا پڑا تھا۔