پاکستان سمیت دنیا بھر میں مقیم کشمیری آج یوم سیاہ منا رہے ہیں

مظفرآباد : پاکستان سمیت دنیا بھر میں مقیم کشمیر ی آج بھارت کے یوم آزادی کو یوم سیاہ کے طور پر منا رہے ہیں۔لائن آف کنٹرول کے دونوں اطراف اور دنیا بھر میں کشمیری بھارت کے غیر قانونی قبضے کے خلاف اپنی آواز بلند کر رہے ہیں۔

مقبوضہ وادی میں مکمل ہڑتال کی صورتحال ہے، تعلیمی ادارے، دکانیں اور کاروباری مراکز بند ہیں اور ٹرانسپورٹ کے نظام کو بھی معطل کر دیا گیا ہے۔ آج کشمیریوں کی جانب سے بھارتی مظالم کے خلاف احتجاجی مظاہرے اور ریلیاں نکالی جائیں گی تاکہ دنیا بھر کے سامنے بھارت کی جارحیت کو بے نقاب کیا جا سکے۔

حریت رہنماؤں نے کشمیری عوام سے اپیل کی ہے کہ وہ بھارت کے غیر قانونی قبضے کے خلاف اپنی آواز بلند کریں اور اس بات کا واضح پیغام دیں کہ وہ بھارتی قبضے کو مسترد کرتے ہیں۔ رہنماؤں کا کہنا ہے کہ بھارت کو مقبوضہ کشمیر میں اپنا یوم آزادی منانے کا کوئی حق نہیں۔
حریت رہنماؤں نے مزید کہا کہ بھارت کا کشمیر پر قبضہ عالمی قوانین اور اقوام متحدہ کی قراردادوں کی کھلی خلاف ورزی ہے۔

گزشتہ روز پاکستان کے یوم آزادی کے موقع پر مقبوضہ وادی میں پاکستان کے حق میں پوسٹرز چسپاں کیے گئے اور پاکستان کے جھنڈے لہرائے گئے۔ یہ مظاہرے بھارتی حکام کے لیے ایک بڑا چیلنج ہیں۔

بھارتی حکام نے مقبوضہ وادی میں مظاہروں اور احتجاج کو روکنے کے لیے سخت اقدامات کیے ہیں۔ علاقے میں بھاری تعداد میں فوجی اور پولیس تعینات کی گئی ہے اور انٹرنیٹ سروس بھی معطل کردی گئی ہے۔

کشمیری رہنماؤں نے عالمی برادری سے اپیل کی ہے کہ وہ کشمیر کے مسئلے پر اپنا کردار ادا کرے اور بھارت پر دباؤ ڈالے کہ وہ کشمیری عوام کو ان کا حق خود ارادیت دے۔