خیبر پختونخوا کے وزیر تعمیرات و مواصلات شکیل احمد خان نے استعفیٰ دیدیا

پشاور: خیبر پختونخوا کے وزیر تعمیرات و مواصلات شکیل احمد خان نے اپنے عہدے سے استعفیٰ دے دیا ہے۔ انہوں نے اپنے استعفیٰ کی وجہ صوبے میں بڑھتی ہوئی کرپشن اور وزیراعلیٰ سمیت دیگر وزراء کے ساتھ اختلافات کو قرار دیا ہے۔

شکیل احمد خان نے کہا کہ وہ اس کرپٹ نظام کا حصہ نہیں رہ سکتے اور وزیراعلیٰ صوبے میں کرپشن کے سرغنہ بن چکے ہیں۔ انہوں نے یہ بھی الزام لگایا کہ علی امین گنڈا پور ان کے محکمے میں مداخلت کر رہے تھے اور وزیراعلیٰ کسی اور کے اشاروں پر کام کر رہے ہیں۔

شکیل احمد خان نے کہا کہ وہ بانی پاکستان تحریک انصاف عمران خان کے اصولوں پر قائم رہنا چاہتے ہیں لیکن موجودہ حکومت ان اصولوں سے ہٹ چکی ہے۔

دوسری جانب، علی امین گنڈا پور نے شکیل احمد خان کے استعفیٰ پر ردعمل دیتے ہوئے کہا کہ انہیں ابھی تک کوئی تحریری استعفیٰ موصول نہیں ہوا ہے۔ انہوں نے کہا کہ ایک کمیٹی نے شکیل احمد خان کو کابینہ سے ہٹانے کی سفارش کی ہے اور اس سلسلے میں گورنر کو ایک سمری بھیجی گئی ہے۔