ملک بھر میں شدید بارشوں کی پیش گوئی، اربن فلڈنگ کا خدشہ

اسلام آباد:محکمہ موسمیات نے ملک بھر میں مون سون کے نئے اسپیل کی آمد کی پیشگوئی کی ہے۔ محکمہ کے مطابق آج سے سندھ میں مون سون کا سلسلہ شروع ہو جائے گا اور یہ سلسلہ 25 اگست تک جاری رہنے کا امکان ہے۔

محکمہ موسمیات کے مطابق 19 اگست تک کراچی، گھوٹکی، میرپورخاص، عمرکوٹ، سانگھڑ، ٹھٹہ اور سکھر سمیت سندھ کے مختلف شہروں میں گرج چمک کے ساتھ بارش ہو سکتی ہے۔

دوسری جانب، گوجرانوالا، حافظ آباد اور چنیوٹ میں تیز بارش کی پیش گوئی کی گئی ہے۔ اس کے پیش نظر، نیشنل ڈیزاسٹر مینجمنٹ اتھارٹی (NDMA) نے پنجاب کے بڑے شہروں میں اربن فلڈنگ کا خدشہ ظاہر کیا ہے۔

وزیراعظم نے این ڈی ایم اے، پی ڈی ایم ایز اور دیگر متعلقہ اداروں کو مون سون کے نئے اسپیل کے دوران ہائی الرٹ رہنے کی ہدایت جاری کی ہے۔ وزیراعظم خود اس صورتحال پر نظر رکھے ہوئے ہیں اور انہوں نے ہدایت کی ہے کہ ہنگامی صورتحال میں لوگوں کے انخلا اور نکاسی آب کی تیاری یقینی بنائی جائے۔