جنوبی لبنان میں اسرائیلی فضائی حملے میں 9 افراد جاں بحق 

جنوبی لبنان میں اسرائیلی فضائی حملے میں 9 افراد جاں بحق ہوگئے ہیں۔ اسرائیلی فوج نے دعویٰ کیا ہے کہ اس نے حزب اللہ کے ہتھیاروں کے اسٹور کو نشانہ بنایا۔ لبنان کی وزارت صحت نے ان ہلاکتوں کی تصدیق کی ہے۔

لبنان کی وزارت صحت کے مطابق حملے میں جاں بحق ہونے والوں میں ایک خاتون اور اس کے دو بچے بھی شامل ہیں۔ اس حملے کے نتیجے میں 5 دیگر افراد زخمی بھی ہوئے ہیں، جن میں سے 2 کی حالت نازک ہے۔ یہ حملہ نباتیح کے علاقے میں کیا گیا، جو اسرائیلی سرحد سے تقریباً 12 کلومیٹر دور واقع ہے۔

غیر ملکی خبر رساں ادارے کے مطابق اسرائیلی فوج نے اپنے ٹیلی گرام چینل پر اطلاع دی کہ اس کی فضائیہ نے رات کے وقت حزب اللہ کے ہتھیاروں کے ذخیرے کو نشانہ بنایا۔ قبل ازیں اسرائیلی فوج نے سوشل میڈیا پر بتایا تھا کہ اس نے مارون الراس اور ایتا الشعب کے دیہات میں فوجی عمارتوں پر حملے کیے ہیں، جو شہر کے جنوب میں 50 کلومیٹر دور واقع ہیں۔

یہ حملے اس وقت کیے گئے ہیں جب 7 اکتوبر کو جنوبی اسرائیل پر فلسطینی گروپ کی طرف سے حملے اور غزہ پر اسرائیل کی بمباری کے بعد حزب اللہ نے اسرائیلی افواج کے ساتھ تقریباً روزانہ جھڑپیں شروع کر رکھی ہیں۔

خبر رساں ادارے اے ایف پی کے مطابق اکتوبر سے اب تک سرحد پار جھڑپوں میں اسرائیلی فورسز نے لبنان میں تقریباً 570 افراد کو ہلاک کیا ہے، جن میں زیادہ تر حزب اللہ کے ارکان ہیں، لیکن کم از کم 118 عام شہری بھی مارے گئے ہیں۔ اس عرصے کے دوران اسرائیل نے لبنان پر 6,500 سے زائد حملے کیے ہیں۔