پی ٹی آئی رہنماء صنم جاوید کی 10 روزہ راہداری ضمانت منظور

پشاور: پشاور ہائی کورٹ نے پاکستان تحریک انصاف (پی ٹی آئی) کی رہنما صنم جاوید کو 10 روزہ راہداری ضمانت دے دی ہے۔ عدالت نے صنم جاوید کو پنجاب کی متعلقہ عدالتوں میں پیش ہونے کا حکم دیا ہے۔

جسٹس ڈاکٹر خورشید اقبال نے صنم جاوید کی راہداری ضمانت کی درخواست پر سماعت کرتے ہوئے یہ فیصلہ سنایا۔ عدالت کو بتایا گیا کہ صنم جاوید کے خلاف لاہور اور میانوالی میں دو مقدمات درج ہیں۔

عدالت نے سوال کیا کہ صنم جاوید کی رہائش گاہ لاہور میں ہے تو وہ پشاور میں کیا کر رہی تھیں اور کیا انہیں یہ پتا تھا کہ ان کے خلاف مقدمات درج ہو چکے ہیں؟ وکیل نے عدالت کو بتایا کہ صنم جاوید کو عدالت میں داخل ہونے کی اجازت نہیں دی جا رہی تھی، اسی لیے انہوں نے پشاور ہائی کورٹ میں عبوری ضمانت کی درخواست دائر کی تھی۔

عدالت نے ایک لاکھ روپے کے ضمانتی مچلکے جمع کرانے کے بعد صنم جاوید کو 10 روزہ راہداری ضمانت منظور کر لی۔