امام بارگاہ پر ہونے والے خودکش حملے میں ملوث بمبار کی شناخت ہو گئی،ذرائع

اسلام آباد:حکومتی ذرائع کا کہنا ہے کہ وفاقی دارالحکومت اسلام آباد کے علاقے ترلائی میں واقع امام بارگاہ پر ہونے والے خودکش حملے میں ملوث بمبار کی شناخت کرلی گئی ہے۔

حکومتی ذرائع کا کہنا ہے کہ مصدقہ اطلاعات کے مطابق خودکش بمبار نے افغانستان سے دہشتگرد کارروائیوں کی تربیت لی ،خودکش بمبار متعدد بار افغانستان کا سفر کر چکا ہے ، کچھ عرصہ پہلے افغانستان سے آیا تھا۔

ذرائع نے مزید بتایا کہ افغانستان میں موجود دہشتگرد گروہ طالبان رجیم کی سرپرستی میں خطے کی سلامتی کیلئے خطرہ ہیں،پاکستان میں ہر دہشتگرد کارروائی کے پس پشت افغانستان اور بھارت کا گٹھ جوڑ ہے۔

ذرائع کا کہنا ہے کہ پوری قوم ایسی بزدلانہ کارروائیوں کے سامنے سیسہ پلائی دیوار کی طرح کھڑی ہے،مساجد اور معصوم شہریوں پر حملے پاکستانی قوم کے عزم کو متزلزل نہیں کر سکتے۔

سیکیورٹی فورسز نے دھماکے کے شواہد حاصل کرلیے

دوسری جانب سیکیورٹی فورسز نے اسلام آباد کے علاقے ترلائی کے امام بارگاہ میں خود کش دھماکے کے شواہد حاصل کرلیے ہیں جب کہ امام بارگاہ میں دھماکے کے وقت کی سی سی ٹی فوٹیج بھی حاصل کر لی گئی ہے۔

سی سی ٹی وی فوٹیج کے مطابق امام بارگاہ میں دھماکا ایک بج کر 38 منٹ پر ہوا، امام بارگاہ کے روٹ اور دھماکے کے وقت بھگدڑ دیکھی جا سکتی ہے اور فوٹیج میں دھماکے کی آواز سنتے ہی شہریوں کو بھاگتے ہوئے بھی دیکھا جا سکتا ہے۔

سی سی ٹی وی فوٹیج میں حملہ آور کو بھاگ کر امام بارگاہ میں داخل ہوتے بھی دیکھا جا سکتا ہے جب کہ دھماکے کے بعد باہر شہریوں کو بھاگتے ہوئے بھی سی سی ٹی وی فوٹیج میں دیکھا جا سکتا ہے۔

واضح رہے کہ اسلام آباد کے علاقے ترلائی میں نمازِ جمعہ کے دوران مسجد میں ہونے والے خودکش دھماکے کے نتیجے میں 31 افراد جاں بحق اور 169 سے زائد زخمی ہوگئے ہیں۔

پولیس ذرائع کے مطابق ترلائی میں نماز جمعہ کے دوران خودکش حملہ آور نے مسجد میں داخل ہونے کی کوشش کی جسے وہاں موجود افراد نے روکا جس پر اس نے خود کو دھماکے سے اڑا لیا۔