اسلام آباد ہائیکورٹ کادارلحکومت میں احتجاج، ریلی یا دھرنے کی اجازت نہ دینے کا حکم

پی ٹی آئی کا اسلام آباد میں احتجاج رکوانے کیلئے دائر درخواست پر تحریری حکمنامہ جاری کردیاگیا۔

اسلام آباد ہائیکورٹ کے چیف جسٹس عامر فاروق نے تحریری حکمنامہ جاری کیا۔ اسلام آباد ہائیکورٹ نے حکومت کو پی ٹی آئی کے ساتھ مذاکرات کیلئے کمیٹی بنانے کی ہدایت کردی، عدالت نے کہاکہ مناسب ہو گا کہ حکومت وزیرداخلہ یا کسی اورشخص کی سربراہی میں کمیٹی تشکیل دے، حکومت کی جانب سے بنائی گئی کمیٹی پی ٹی آئی قیادت کو انگیج کرے۔ عدالتی حکم  نامے میں کہا گیا ہے کہ کمیٹی پی ٹی آئی قیادت کو بیلاروس کے صدر کے دورے کے دوران حساس صورتحال سے آگاہ کرے۔ 

اسلام آباد ہائیکورٹ نے احتجاج سے متعلق نئے قانون کی خلاف ورزی میں احتجاج، ریلی یا دھرنے کی اجازت نہ دینے کا حکم دیا۔اسلام آباد ہائیکورٹ نے مزید کہا کہ کمیٹی میں چیف کمشنر اسلام آباد کو بھی شامل کیا جائے،عدالت کو یقین ہے کہ جب یہ رابطہ ہو گا تو کچھ نا کچھ پیش رفت ہو گی عدالتی فیصلے میں کہا گیا  ہے کہ امن و امان قائم رکھنے کیلئے انتظامیہ قانون کے مطابق تمام اقدامات اٹھائے،انتظامیہ کی ذمہ داری ہے قانون کی خلاف ورزی نہ ہونے دی جائے۔

فیصلے میں مزید کہا گیا ہے کہ یقینی بنایا جائے عام شہریوں کے کاروبار زندگی میں کوئی رخنہ نہ پڑے،پُرامن احتجاج، ریلی وغیرہ کی اجازت کیلئے مروجہ قانون ہے،اسلام آباد انتظامیہ مروجہ قانون کے خلاف دھرنا، ریلی یا احتجاج کی اجازت نہ دے۔  یاد رہے کہ تاجر رہنماؤں کی جانب سے احتجاج کے خلاف اسلام آباد ہائیکورٹ میں درخواست دائر کی گئی تھی،چیف جسٹس عامر فاروق کی عدالت میں فوری سماعت کی گئی،وزیر داخلہ محسن نقوی بھی عدالت میں پیش ہوئے۔