صدرمملکت، وزیراعظم اور وزیر داخلہ کا خیبرمیں کامیاب آپریشن پر سیکیورٹی فورسز کو خراج تحسین 

اسلام آباد:صدر مملکت آصف علی زرداری،وزیراعظم شہبازشریف اور وزیر داخلہ محسن نقوی نے ضلع خیبر میں فتنہ الخوارج کے دہشتگردوں کیخلاف کامیاب کارروائی پر سیکیورٹی فورسز کو خراج تحسین پیش کیا ہے۔ 
صدر آصف علی زرداری نے سیکیورٹی فورسز کو کامیاب کارروائی کر نے پر خراج تحسین پیش کیا اور ملک میں امن وامان کے قیام کے لیے سیکیورٹی فورسز کے کردار کو سراہا۔اپنے بیان میں انہوں نے مزید کہا کہ ملک سے دہشت گردی کے خاتمے اور امن کی بحالی کے لیے سیکیورٹی ادارے اورعوام ایک دوسرے کے شانہ بشانہ کھڑے ہیں۔
وزیراعظم شہباز شریف نے سیکیورٹی فورسز کی جانب سے 5 خوارجی دہشت گردوں کو ہلاک کرنے پر سیکیورٹی فورسز کو خراج تحسین پیش کرتے ہوئے کہاکہ دہشتگردوں کیخلاف جاری جنگ میں پوری قوم سیکیورٹی فورسز کے ساتھ کھڑی ہے،
انہوں نے مزید کہا کہ ملک سے ہر قسم کی دہشتگردی کے مکمل خاتمے کیلئے پر عزم ہیں۔
وفاقی وزیرداخلہ محسن نقوی کا کہناتھا کہ سیکیورٹی فورسز نے آج بھی بروقت آپریشن کرکے 5 خوارجی دہشتگردوں کو عبرتناک انجام تک پہنچایا،خارجی دہشتگردوں کو پاکستان میں کہیں چھپنے کی جگہ نہیں ملے گی،انہوں نے مزید کہا کہ خوارجی دہشتگردوں کے مذموم عزائم ناکام بنانے پر سیکیورٹی فورسز کو شاباش دیتے  ہیں۔ 
محسن نقوی کاکہناتھا کہ سیکیورٹی فورسز کے قیام امن کیلئے اقدامات کو سراہتے ہیں، خوارجی دہشتگردوں کے مکمل خاتمے تک جنگ جاری رہے گی۔