بھارت میں مذہبی تقریب کے دوران اسٹیج گرنے سے 7 افراد ہلاک،متعدد زخمی

لکھنؤ:بھارتی ریاست اترپردیش کے علاقے جین نروان میں ایک میلے کے تقریب کےدوران اسٹیج گرنے کے نتیجے میں 7 افراد ہلاک اور خواتین و بچوں سمیت 40 افراد زخمی ہو گئے ہیں۔
بھارتی میڈیا رپورٹس کے مطابق  یہ افسوسناک حادثہ اس وقت پیش آیا جب تقریب کے دوران عارضی طور پر بنایا گیا اسٹیج جو بانس اور لکڑی سے تعمیر کیا گیا تھا، زیادہ وزن کی وجہ سے گر گیا۔
یہ واقعہ اس وقت ہوا جب سیکڑوں عقیدت مند جین مذہبی رہنماؤں کی موجودگی میں بھگوان آدتی ناتھ کو لڈو چڑھانے کے لیے مقام پر پہنچے تھے۔
 اسٹیج کے گرنے کی وجہ سے درجنوں افراد اس کے نیچے دب گئے۔ زخمیوں میں بیشتر خواتین اور بچے شامل ہیں، زخمیوں کو فوری طبی امداد کیلئے قریبی اسپتال منتقل کیا گیا جہاں 7 افراد دم توڑ گئے جب کہ دیگر 20 افراد کو طبی امداد دے کر اسپتال سے ڈسچارج کردیا گیا۔
پولیس کی جانب سےحادثے کی تحقیقات کا آغاز کر دیا گیا ہے اور اس بات کا جائزہ لیا جا رہا ہے کہ عارضی اسٹیج کی ساخت اور انتظامات میں کہاں کمی رہ گئی تھی جس کی وجہ سے اس طرح کا سانحہ پیش آیا۔
ضلعی پولیس کا کہنا ہے کہ یہ ایونٹ تقریباً 30 سالوں سے ہر سال منعقد کیا جا رہا تھا، اور اس موقع پر بڑی تعداد میں عقیدت مند شرکت کرتے ہیںیہ واقعہ پہلی مرتبہ پیش آیا جس کی تحقیقات شروع کردی گئی ہیں۔