کسی کو مراد علی شاہ سے مسئلہ ہے تو مجھ سے بات کرے کہیں اور جاکر چغلی نہ کرے، چئیرمین بلاول بھٹو

کراچی:پاکستان پیپلز پارٹی کے چئیرمین بلاول بھٹو کا کہنا ہے کہ کسی کو وزیراعلیٰ یا کسی وزیر یا بیورو کریسی سے شکایت ہے تو مجھ سے کرے یہ صوبہ پیپلز پارٹی کا ہے کہیں اور جاکر چغلی کرنے کی ضرورت نہیں۔
چئیرمین پیپلز پارٹی نے کراچی میں تاجروں کے اعزاز میں منعقدہ تقریب سے خطاب کرتے ہوئے کہا کہ میں تاجروںکے مسائل کو حل کرنے کے لیے پوری کوشش کروں گا ،انہوں نے مزید کہا کہ اگر کسی کو وزیراعلیٰ یا کسی وزیر یا بیورو کریسی سے شکایت ہے تو مجھ سے کرے یہ صوبہ پیپلز پارٹی کا ہے کہیں اور جاکر چغلی کرنے کی ضرورت نہیں۔
دراصل چئیرمین بلاول بھٹو نے یہ بات کراچی کے تاجروں کی احسن اقبال کو لگائی جانے والی شکایت کے ردعمل میں کہی ہے۔
سندھ میں امن و امان کی صورتحال کے حوالےسے بات کرتے ہوئے چیئرمین پی پی نے کہا کہ سندھ میں امن و امان کی صورتحال پیپلز پارٹی وجہ سے بہتر ہوئی ہے انہوں نے کہا کہ آج آپ سے بھتہ نہیں مانگا جا رہا، صنعتوں کو بند کر کے مزدوروں کو سیاسی جلسوں میں نہیں لے جایا جا رہا اور آپ کی زندگی کو کوئی خطرہ نہیں۔
اپنی تقریر میں انہوں نے مزید کہا کہ تاجر برادری کے مسائل بہت پہلے حل ہو جانے چاہیے تھے، اور کراچی اور ملک کی ترقی میں تاجر برادری کا اہم کردار ہے،انہوںنے سوال کرتے ہوئے کہا کہ ’کیا میں نے کبھی آپ کو تنگ کیا؟‘ اور کہا کہ ’میں کیوں چاہوں گا کہ میرے یا میری حکومت کے نام پر تاجروں کو تنگ کیا جائے؟‘
چئیرمین بلاول نے کہا کہ سندھ حکومت کے پبلک پرائیویٹ پارٹنر شپ منصوبے منافع میں ہیںانہوںنے مزید کہا کہ اسلام آباد میں فیصلے کیے جاتے ہیں ٹیرف سیٹ کیے جاتے ہیں ہم سے مشورے کے بغیر پالیسیاں بنائی جاتی ہیں اور نقصان سب اٹھاتے ہیں جتنا سعودی عرب کے پاس تیل ہے اتنا سندھ کے پاس کوئلہ ہے، ہمارا مطالبہ ہے کہ بجلی دیں اور سستی بجلی دیں۔
بلاول بھٹو نے وفاقی حکومت پر سخت الفاظ میں تنقید کرتے ہوئے کہا کہ  وزیراعظم اور وفاقی وزرا ڈھٹائی سے کہتے ہیں کہ ہم نے پاکستان سے لوڈ شیڈنگ ختم کردی آپ مجھے سندھ یا کوئی ایک شہر بتادیں جہاں لوڈ شیڈنگ نہیں ہورہی۔
ان کا کہنا تھا کہ وفاق کے رویے کے سبب سندھ حکومت بجلی کے اپنے منصوبوں کی جانب بڑھ رہی ہے ہم جو منصوبے شروع کرنے جارہے ہیں ہمیں اس کے لیے اسلام آباد سے اجازت لینے کی ضرورت نہیں۔