قلعہ عبداللہ:سیکیورٹی فورسزکی کارروائی میں دوخودکش حملہ آورسمیت5خارجی ہلاک

راولپنڈی:سیکیورٹی فورسز نے بلوچستان کے ضلع قلعہ عبداللہ میں کارروائی کرتے ہوئے دو خود کش حمل آوروں سمیت 5 خارجی دہشت گردوں کو ہلاک کر دیا۔
پاک فوج کے شعبہ تعلقاتِ عامہ( آئی ایس پی آر) کی جانب سے جاری کر دہ  اعلامیے کے مطابق بلوچستان کے ضلع قلعہ عبداللہ کےعلاقے گلستان میں خارجی دہشت گردوں نےسیکیورٹی فورسز کی چیک پوسٹ پر حملہ کیا، جس کو سیکیورٹی فورسز کی موثر کارروائی کے نتیجے میں ناکام بنا دیا گیا۔
ترجمان آئی ایس پی آڑ کے مطابق حملے  کے بعد دہشت گردوں نے بارودی مواد سے بھری گاڑی چوکی کی بیرونی دیوار سے ٹکرا دی، اس دوران سیکیورٹی فورسز اور خارجیوں کے درمیان شدید فائرنگ کا تبادلہ ہوا جس کے نتیجے میں تمام پانچ دہشت گرد ہلاک ہوگئے جن میں دو خودکش حملہ آور بھی شامل تھے۔
خارجیوں کے ساتھ فائرنگ کے تبادلے میں نائیک  طاہرخان اورلانس نائیک طاہراقبال بہادری سے لڑتے ہوئے شہید ہوگئےشہید ہونے والے نائیک طاہر خان کا تعلق ضلع ٹانک جبکہ نائیک طاہر اقبال کا تعلق ضلع کرک سے ہے۔
ترجمان کا کہنا ہے کہ علاقے میں دیگردہشت گردوں کی تلاش کے لیے سینٹائزڈ آپریشن جاری ہے،ترجمان نے مزید کہا کہ پاکستان کی سیکیورٹی فورسز دہشت گردی کے خاتمے کے لیے پُرعزم ہیں،  ہمارے بہادر جوانوں کی قربانیاں ہماری اس جدوجہد کو مزید مضبوط کرتی ہیں۔