190 ملین پاؤنڈ ریفرنس کیس : ملک ریاض سمیت چاراشتہاری ملزمان کے پاسپورٹ منسوخ

اسلام آباد:190 ملین پاونڈ ریفرنس کیس میں بحریہ ٹاؤن کے مالک ملک ریاض ، ان کے بیٹے علی ریاض ،فرح شہزادی عرف گوگی اور سابق مشیر برائے احتساب شہزاد اکبر کے پاسپورٹس منسوخ کر دیےگئے۔
وفاقی وزارت داخلہ نے قومی احتساب بیورو (نیب) کی درخواست پر 190 ملین پاؤنڈ اسکینڈل کے مقدمے میں اشتہاری ملزمان کے خلاف کارروائی کا آغاز کرتے ہوئے ان کےپاسپورٹس منسوخ کر دیے۔
ذرائع کا کہنا ہے کہ وزارتِ داخلہ نے نیب کی سفارش پر 190 ملین پاؤنڈ اسکینڈل میں 4 اشتہاری ملزمان کے پاسپورٹ منسوخ کیے، نیب نے 28 جنوری کو ملزمان کے پاسپورٹ منسوخ کرنے کے لیے وزارت داخلہ کو خط لکھا تھا۔
خیال رہے کہ ایک روز قبل قومی احتساب بیورونے ملک ریاض اور ان کے بیٹے علی ریاض ملک کو متحدہ عرب امارات سے وطن واپس لانے کا عمل شروع کر دیا تھا، نیب حکام نے ملک ریاض اور ان کے بیٹے کی حوالگی کے لیے اماراتی حکام سے رابطہ کیا تھا۔
 نیب ذرائع کا کہنا ہےکہ پراپرٹی ٹائیکون ملک ریاض کو بین الاقوامی انسداد منی لانڈرنگ قوانین اور ویانا کنونشن کے تحت متحدہ عرب امارات سے ملک بدر کروایا جائے گا۔
نیب نے متحدہ عرب امارات کے حکام سے ملک ریاض کی حوالگی کے لیے رابطہ کیا تھا، جن کے بارے میں خیال کیا جاتا ہے کہ وہ اپنے اثر و رسوخ کی وجہ سے ناقابل گرفت ہیں۔