فیصل آباد:دوران ڈکیتی شوہر کے سامنے خاتون سے اجتماعی زیادتی کرنیوالا مرکزی ملزم گرفتار

فیصل آباد پولیس نے کارروائی کرتے ہو ئے دوران ڈکیتی شوہر کے سامنے خاتون سے اجتماعی زیادتی کرنیوالے مرکزی ملزم کوگرفتارکر لیا۔
پولیس نے واقعے میں ملوث تینوں ملزمان کو گرفتار کر کے شناخت پریڈ کے لیے جیل بھیج دیا۔
پولیس کے مطابق فیصل آباد کے علاقے تھانہ ساندل بار کے علاقہ 62 ج ب چنن موٹروے کے قریب 4 روز قبل دوران ڈکیتی خاتون کو اس کے شوہر کے سامنے اجتماعی زیادتی کا نشانہ بنانے کے معاملہ میں اہم پیش رفت سامنے آئی ہے۔ پولیس نے واقعے میں ملوث تیسرے ملزم عمر حیات کو بھی گرفتار کرکے شناخت پریڈ کیلئے جیل بھجوا دیا۔
پولیس کے مطابق گزشتہ روز تین ملزمان کیخلاف دوران ڈکیتی خاتون سے اجتماعی زیادتی کا مقدمہ درج ہوا تھا۔
جبکہ اس سے قبل تھانہ ساندل بار پولیس نے واقعے کے دو ملزمان علی شیر اور فیصل کو گرفتار کیا تھا، دونوں ملزمان عدالت کے حکم پر شناخت پریڈ کیلئے پہلے ہی جیل میں ہیں۔
یاد رہے کہ وزیر اعلیٰ پنجاب مریم نواز اور آئی جی پنجاب عثمان انور نے اس واقعہ کا نوٹس لیا تھا۔