سانحہ 9 مئی احتجاج یا ریلی نہیں بلکہ ادارےپر حملہ تھا، پنجاب حکومت کی رپورٹ سپریم کورٹ میں پیش

اسلام آباد: پنجاب حکومت نے سانحہ 9 مئی سے متعلق رپورٹ سپریم کورٹ میں پیش کر دی،جس میں کہا گہا ہے کہ نو مئی احتجاج یا ریلی نہیں بلکہ ایک ادارے پر حملہ تھا۔
 پنجاب حکومت کی پیش کردہ رپورٹ میں بتایا گیا ہے کہ پنجاب میں 9 مئی کے ہنگاموں سے 19 کروڑ 70 لاکھ روپے کا نقصان ہوا۔ اور 9 مئی کے 24 ہزار 595 ملزمان تاحال مفرور ہیں۔
رپورٹ کے مطابق 9 مئی کو پنجاب کے 38 شہروں میں توڑ پھوڑ کرتے ہوئے املاک کو نقصان پہنچایا گیا، لاہور میں 110 ملین کی املاک کو نقصان پہنچایا گیا، اسی طرح راولپنڈی میں 26 ملین کا نقصان پہنچایا گیا، میانوالی میں 50 ملین کا نقصان ہوا۔
پنجاب حکومت کے وکیل نے رپورٹ میں بتایا کہ 9 مئی کو ایک ادارے پر حملہ کیا گیا، 9 مئی صرف احتجاج یا ریلی نہیں بلکہ ادارے پر حملہ تھا۔
پنجاب بھر کے 38 اضلاع میں 319 مقدمات درج ہوئے۔ ملزمان کی تعداد 35 ہزار 962 ہے۔ جبکہ 11 ہزار 367 ملزمان گرفتار ہوئے۔
سپریم کورٹ میں جمع کرائی گئی رپورٹ کے مطابق پنجاب میں 9 مئی پرتشدد احتجاج کے سبب ملک کو 197 اشاریہ 348 ملین روپے کا نقصان ہوا اور پرتشدد احتجاج کے سبب 152 پولیس افسران اور اہلکار زخمی ہوئے۔