شمالی وزیر ستان میں گیس کا ایک اور کنواں دریافت

شمالی وزیرستان :تیل و گیس کی پیداوار کے شعبے سے اچھی خبر ، ماڑی پٹرولیم انرجیز نے شمالی وزیرستان کے سپین وام 1 کنویں کی لوکہارٹ فارمیشن میں تیل اور گیس کا نیا ذخیرہ دریافت کر لیا۔
تفصیلات کے مطابق ماڑی انرجیز لمیٹڈ نے ڈیڑھ ماہ کے دوران شمالی وزیرستان سے گیس اور تیل کی چوتھی دریافت کا اعلان کردیا۔
ماڑی انرجیز کے اعلامیے میں بتایا گیا ہےکہ نئی دریافت سے یومیہ 7 کروڑ 3 لاکھ مکعب فٹ گیس حاصل ہو گی جبکہ نئی دریافت سے یومیہ 310 بیرل خام تیل بھی حاصل ہو گا۔
ماڑی انرجیز نے اس دریافت کو پاکستان میں تیل و گیس کے حوالے سے حوصلہ افزا قرار دیا ہے ،ماڑی انرجیز کے چیئرمین نے تعاون کرنے پر سکیورٹی فورسز، وفاقی و صوبائی حکومتوں اور وزارتِ پیٹرولیم کا شکریہ ادا کیا۔
خیال رہے کہ گزشتہ ہفتے ماڑی انرجیز نے وزیرستان بلاک سے تیسری دریافت کا اعلان کیا تھا، تیسری دریافت سے 2 کروڑ 38 لاکھ مکعب فٹ یومیہ گیس اور یومیہ 122 بیرل خام تیل کا تخمینہ لگایا گیا تھا،جب کہ اس سے قبل مارچ اور فروری میں بھی ماڑی انرجی لمیٹڈ نے گیس کی دریافت کا اعلان کیا تھا۔