منی لانڈرنگ کیس: لاہور ہائیکورٹ نےشہباز شریف اور حمزہ شہباز کے خلاف درخواست خارج کر دی

لاہور ہائیکورٹ میں منی لانڈرنگ کیس میں شہباز شریف، حمزہ شہباز اور دیگر کیخلاف مقدمے میں بڑی پیش رفت سامنے آئی ہے۔ عدالت عالیہ نے شہزاد اکبر کی جانب سے دائر کردہ درخواست کو عدم پیروی کی بنیاد پر خارج کر دیا۔
تفصیلات کے مطابق شہزاد اکبر نے ٹرائل کورٹ کی جانب سے شہباز شریف، حمزہ شہباز اور سلمان شہباز کی بریّت کے فیصلے کو چیلنج کیا تھا۔ تاہم چیف جسٹس لاہور ہائیکورٹ جسٹس عالیہ نیلم نے درخواست پر سماعت کے دوران وکیل کی جانب سے پیش نہ ہونے پر اسے خارج کر دیا۔
عدالت کا کہنا تھا کہ کیس کو عدم پیروی کے باعث نمٹا دیا گیا ہے۔
واضح رہے کہ ایف آئی اے نے 2020 میں تحریک انصاف کی حکومت کے دوران شریف فیملی کے خلاف منی لانڈرنگ کا مقدمہ درج کیا تھا۔ کیس کی طویل کارروائی کے بعد ٹرائل کورٹ نے وزیراعظم شہباز شریف، حمزہ شہباز اور سلمان شہباز کو بری کر دیا تھا۔